जालना- जिल्ह्यातील वाळू तस्करी ही काही नवीन नाही. यापूर्वी देखील भोकरदनच्या महिला तहसीलदार या वाळूच्या तस्करी प्रकरणी निलंबित झाल्या होत्या. काल अंबडच्या तहसीलदार मनीषा मेने यांना विभागीय आयुक्त सुनील केंद्रेकर यांनी तडकाफडकी निलंबित केले. त्यांच्या या निलंबनानंतर या प्रकरणात गुंतलेल्या अनेक अधिकार्‍यांचे धाबे दणाणले आहे.
जिल्हाधिकारी कार्यालय परिसरातून वाळूचे दोन हायवा गायब सोमवार दि. २५ नोव्हेंबर रोजी जिल्हाधिकारी कार्यालयाच्या आवारामध्ये वाळूची अवैध वाहतूक करणारे दोन हायवा ट्रक जप्त करून उभे करण्यात आले होते. सकाळी सहा वाजता जप्त केलेले हे हायवा ट्रक परिसरातून गायब होते. मात्र, आत्तापर्यंत याविषयी कोणीही तक्रार दिली नाही. काल तहसीलदार मनीषा मेने यांना निलंबित करण्यात आल्यानंतर वाळू माफियांशी साटेलोटे करणाऱ्या या अधिकाऱ्यांचे धाबे दणाणले आहे. आणि जप्त केलेले दोन्ही हायवा ट्रक चोरीला गेल्याची तक्रार खुद्द शासकीय अधिकाऱ्याने तालुका जालना पोलीस ठाण्यात नोंदवली आहे. त्यामुळे, गेल्या चार दिवसांपासून ही तक्रार का दिली नाही? असा प्रश्न उपस्थित केला जात आहे.
भोकरदन, जाफराबाद, अंबड, घनसावंगी हे चार तालुके वाळू माफियांसाठी सोन्याची खाण आहेत. शासकीय कर्मचारी त्यांच्या दिमतीला तयार असतात असे देखील अनेक वेळा निष्पन्न झाले आहे. त्यातूनच काल मनीषा मेने यांना निलंबित करण्यात आले आहे. जिल्हाधिकारी कार्यालयातील अव्वल कारकून शांतीराम गोरखनाथ खांडेभराड यांना जिल्हाधिकारी यांच्या गौण खनीज भरारी पथकामध्ये नियुक्त करण्यात आले होते.
सोमवार दिनांक २५ रोजी शहरात फिरत असताना पथकाने सकाळी साडेचार वाजेच्या सुमारास दुखीनगर येथे क्र. (एम.एच २१. बी.एच. २१००) या वाहनाला पकडले. यावेळी वाहन चालक सुनील ठोंबरे यांनी हायवा ट्रकमधील वाळू रिकामी केली. त्यानंतर हायवा ट्रक जिल्हाधिकारी कार्यालयात आणून उभा केला. त्यानंतर कन्हैया नगर परिसरात वाहन क्र. (एम.एच.२१. बीएच. ०७०७) या हायवा ट्रकमध्ये चालक संतोष भानुदास दानवे याला देखील भरलेल्या वाळू विषयी विचारणा करण्यात आली. मात्र, त्याच्याजवळ वाळू वाहतुकीबाबत कुठलीही परवानगी आढळली नाही. त्यामुळे हे दोन्ही हायवा ट्रक सकाळी सहा वाजेच्या सुमारास जिल्हाधिकारी कार्यालयात आणून उभे करण्यात आले होते.
त्यानंतर शांतीलाल खांडेभराड हे कार्यालयाच्या किल्ल्या आणण्यासाठी बाहेर गेले. साडेनऊ वाजता परता आल्यानंतर खांडेभराड यांना दोन्ही वाहने गायब झाल्याचे लक्षात आले. त्यामुळे सोमवार दिनांक २५ रोजी घडलेल्या या घटनेविषयी पोलीस ठाण्यात तक्रार का देण्यात आली नाही? असा प्रश्न उपस्थित केल्या जात आहे. प्रत्येकी १५ लाख रुपये किमतीचे २ हायवा ट्रक आणि एका हायवा ट्रकमधील पाच ब्रास वाळू ज्याची किंमत १० हजार रुपये आहे, असा एकूण ३० लाख १० हजार रुपयांचा माल जिल्हाधिकारी कार्यालयाच्या परिसरातून चोरीला गेल्याची तक्रार अव्वल कारकून शांतीराम खांडेभराड यांनी तालुका जालना पोलीस ठाण्यात दिली. या तक्रारीवरून आज दुपारी एक वाजता गुन्हा दाखल झाला आहे. आणि पोलिसांनी घटनास्थळाचा पंचनामाही केला आहे. त्यामुळे, मनीषा मेने यांच्या निलंबनानंतर वाळू माफियांची संगणमत केलेल्या अधिकाऱ्यांचे धाबे दणाणले आहेत.
हेही वाचा-कापूस वेचणीसाठी मजूर मिळेना, बळीराजाचे प्रश्न सुटेना
