सुशांतसिंह मृत्यू प्रकरण : व्हाट्सअ‌ॅप चॅटबाबत उज्ज्वल निकम यांनी 'हे' व्यक्त केले मत

सुशांतसिंह मृत्यू प्रकरणाचा तपास करताना अमली पदार्थांचे बॉलिवुडमधील कनेक्शन समोर आले आहे. काही अभिनेत्रींचे व्हॉट्सअप चॅट ड्रग्स संदर्भात पुरावे म्हणून सक्षम नाहीत, असे स्पष्ट मत विशेष सरकारी वकील उज्ज्वल निकम यांनी व्यक्त केले आहे.

जळगाव - बॉलिवुडचे काही अभिनेते आणि अभिनेत्री यांच्या मोबाईलवरील व्हाट्सअ‌ॅप चॅटवरून ड्रग्ज संदर्भात काही नावे निष्पन्न झाली आहेत. मात्र, फक्त व्हाट्सअ‌ॅप चॅट हा त्यांच्याविरुद्ध कारवाई करण्यासाठी सक्षम पुरावा होऊ शकत नाही. त्यासाठी नार्कोटिक्स कंट्रोल ब्युरोला (एनसीबी) या प्रकरणाची पाळेमुळे शोधावीच लागतील, असे मत विशेष सरकारी वकील उज्ज्वल निकम यांनी व्यक्त केले आहे.

अभिनेता सुशांतसिंह राजपूत आत्महत्या प्रकरणात नार्कोटिक्स कंट्रोल ब्युरो विभागाकडून तपास सुरू आहे. या तपासादरम्यान जया हिच्या व्हाट्सअप चॅटमध्ये मिळालेल्या माहितीवरून बॉलिवुडमधील काही अभिनेत्रींना नार्कोटिक्स कंट्रोल ब्युरोने समन्स बजावले आहे. यामध्ये रकुलप्रीत सिंग, फॅशन डिझायनर सिमॉन खंबाटा, अभिनेत्री सारा अली खान, अभिनेत्री दीपिका पदुकोण यांचा समावेश आहे. या विषयावर बोलताना विशेष सरकारी वकील उज्ज्वल निकम यांनी आपले मत मांडले आहे. ते म्हणाले, की या प्रकरणात अभिनेता किंवा अभिनेत्रींचे मोबाईलवरील व्हाट्सअ‌ॅप चॅट सक्षम पुरावा ठरणार नाही. या प्रकरणी कायदेशीर कारवाई करण्यासाठी नार्कोटिक्स कंट्रोल ब्युरोला सखोल तपास करावा लागणार आहे. संबंधित अभिनेते किंवा अभिनेत्री या कुणाकडून ड्रग्ज घेत होत्या, हे नार्कोटिक्स कंट्रोल ब्युरोला पाहावे लागणार आहे.

ते ड्रग्ज सिंडिकेट्सचे सदस्य होते का, याचा शोधही नार्कोटिक्स कंट्रोल ब्युरोला घ्यावा लागेल. परंतु, या प्रकरणातील काही ड्रग्ज पेडलरने नार्कोटिक्स कंट्रोल ब्युरोकडे आपले जबाब दिले आहेत. त्यात काहींच्या बाबतीत ते ड्रग्ज घेत असल्याचे स्पष्ट झाले आहे. त्यामुळे जर हा कटाचा भाग असेल तर अभिनेते व अभिनेत्रींच्या मोबाईलवरील व्हाट्सअप चॅट सक्षम पुरावा म्हणून त्यांच्याविरोधात वापरता येऊ शकतो, असेही निकम यावेळी म्हणाले.

म्हणून नार्कोटिक्स कंट्रोल ब्युरोने समन्स दिले असावे-

ड्रग्ज प्रकरणात काही ड्रग्ज पेडलरने नार्कोटिक्स कंट्रोल ब्युरोकडे आपले जबाब दिले. त्यानंतर बॉलिवुडमधील अनेकांची नावे समोर आली आहेत. ज्यांची नावे समोर आली, ते स्वतः साठी ड्रग्ज घेत होते का? किती प्रमाणात घेत होते, कोणाकडून घेत होते, ड्रग्जचा पुरवठा कोणाकडून व कोठून होत होता, याचा शोध नार्कोटिक्स कंट्रोल ब्युरोला घ्यायचा असावा. त्यामुळे अभिनेत्रींना समन्स दिले असावे. अभिनेत्रींच्या चौकशीनंतर या प्रकरणाची पाळेमुळे शोधता येतील. परंतु, अभिनेत्रींना व्हॉट्सअपच्या चॅटमुळे शिक्षा होईल का, हे आताच सांगता येणार नाही. हा सारा तपासाचा भाग आहे. तपासानंतर याचा उलगडा होईलच, असेही निकम यांनी सांगितले.