जळगाव- जिल्हा पोलीस दलातील 3 कर्मचाऱ्यांना मालेगाव येथे बंदोबस्तावर असताना कोरोनाची लागण झाली होती. सुदैवाने, या तीनही पोलीस कर्मचाऱ्यांनी कोरोनावर यशस्वीपणे मात केली आहे. आज (बुधवार) पोलीस अधीक्षक कार्यालयात त्या तिघा पोलिसांचा, वरिष्ठ पोलीस अधिकाऱ्यांच्या हस्ते गुलाबपुष्प देऊन सत्कार करण्यात आला.
नाशिक जिल्ह्यातील मालेगाव येथे मागील पंधरवड्यात कोरोनाचा प्रादुर्भाव वेगाने वाढत होता. त्यामुळे तेथील परिस्थिती हाताबाहेर जाऊन कायदा व सुव्यवस्थेचा प्रश्न निर्माण होण्याची भीती होती. या अनुषंगाने नाशिक परिक्षेत्राच्या आदेशानुसार जळगाव जिल्ह्यातून 100 पोलीस कर्मचारी आणि अधिकारी बंदोबस्ताच्या कामासाठी मालेगाव येथे गेलेले होते.
बंदोबस्ताचे काम करत असताना त्यातील 3 पोलीस कर्मचाऱ्यांना कोरोनाची लागण झाली होती. ही बाब समोर आल्यानंतर त्यांना तत्काळ रुग्णालयात दाखल करण्यात आले होते. त्यांच्यावर वेळीच उपचार झाल्याने तिघे कोरोनातून पूर्णपणे बरे झाले आहेत. याच अनुषंगाने पोलीस कर्मचाऱ्यांचे मनोबल वाढावे, इतर पोलिसांसाठी देखील सकारात्मक संदेश जावा, या उद्देशाने तीनही पोलीस कर्मचाऱ्यांना पोलीस अधीक्षक कार्यालयात सन्मानित करण्यात आले.