जळगाव - शहरातील तांबापुरातील मच्छीबाजार परिसरात राहणाऱ्या एका १७ वर्षीय तरुणीचा संशयास्पद मृत्यू झाल्याची घटना सोमवारी समोर आली. या तरुणीचा मृतदेह मेहरुण तलावात आढळून आला आहे. तिचा एक हात ओढणीने बांधलेला होता. रामेश्वर कॉलनीतील तरुणाने तिचे अपहरण करत अत्यावर केले आणि त्यानंतर तिचा खून केल्याचा आरोप कुटुंबीयांनी केला आहे. दरम्यान, याप्रकरणी पोलीस अधिक तपास करत आहेत.
मच्छीबाजार परिसरात राहणारी ही तरुणी आदर्शनगरात धुणीभांडी करण्याचे काम करत होती. रविवारी नेहमीप्रमाणे ती सकाळी ११ वाजता कामासाठी गेली होती. यानंतर दुपारी १२.३० वाजता ती काम करत असलेल्या घरातून संशयित विशाल भोई नामक तरुणासोबत गेली होती. दुपारी २ वाजता तरुणीची आई तिला घेण्यासाठी गेली असता, हा प्रकार उघड झाला. सायंकाळपर्यंत तरुणी घरी न आल्यामुळे तिच्या वडिलांनी रामानंदनगर पोलीस ठाण्यात जाऊन फिर्याद दिली. त्यावरून रात्री अज्ञात तरुणाविरुद्ध अपहरणाचा गुन्हा दाखल करण्यात आला होता. यानंतरही कुटुंबीयांनी तरुणीचा शोध सुरू ठेवला होता.
हेही वाचा -व्याधीग्रस्त मुलीवर मांत्रिकाचे अघोरी उपचार, चप्पल तोंडात धरून गावभर फिरवले