माझ्या मामाचं पत्र हरवलं! जळगावात पोस्ट कार्डचा तुटवडा

पूर्वीच्या काळी पोस्ट कार्ड म्हणजे एकमेकांना संपर्क साधण्यासाठी असलेले हक्काचे माध्यम होते. सुख-दुःखाचे निरोप पोहचवणे असो किंवा एकमेकांना काही संदेश देणे असो, पोस्ट कार्डशिवाय दुसरा पर्यायच नव्हता. काळाच्या ओघात पोस्ट कार्ड हरवले आहे. जळगावात पोस्ट ऑफिसमध्ये पोस्ट कार्डचं उपलब्ध नाहीत.

जळगाव -माहिती तंत्रज्ञानाच्या युगात पारंपारिक पत्रलेखन मागे पडले आहे. मात्र, बोटावर मोजण्याइतके जे काही लोकं अजूनही पोस्ट कार्डाचा वापर करतात; त्यांना सध्या पोस्ट कार्ड विकत मिळणेच मुश्किल झाले आहे. जळगावमधील मुख्य पोस्ट कार्यालयात गेल्या तीन ते चार महिन्यांपासून पोस्ट कार्ड मिळत नसल्याने नागरिकांची गैरसोय होत आहे.

तार, टेलिफोन, पेजर, फॅक्स, मोबाईल यांसारख्या तांत्रिक साधनांपाठोपाठ ईमेल, व्हाट्सअॅप, फेसबुक, इंस्टाग्राम अशी समाजमाध्यमे आली. माहिती-तंत्रज्ञानाच्या युगामुळे झालेल्या क्रांतिकारी बदलात पारंपरिक पोस्ट कार्ड मात्र बेपत्ता झाले आहे. पोस्टमनही फक्त शासकीय पत्रव्यवहारापर्यंतच मर्यादित राहिले आहेत. अशा परिस्थितीतही काही सर्वसामान्य नागरिक संपर्कासाठी आणि लेखकमंडळी पत्रलेखनाचा छंद जोपासण्यासाठी आजही पोस्ट कार्डचा वापर करतात. जळगावातल्या मुख्य पोस्ट कार्यालयासह जिल्ह्यातील इतर पोस्ट कार्यालयांमध्ये पोस्ट कार्डचा तुटवडा निर्माण झाला आहे. तीन ते चार महिन्यांपासून भारतीय पोस्ट विभागाच्या नाशिक येथील विभागीय भांडारातून पोस्ट कार्डचा पुरवठाच करण्यात आलेला नाही. एरवी मागणीनुसार पोस्ट कार्डचा पुरवठा केला जात होता. मेलद्वारे मागणी केली की, दोन दिवसांत पोस्ट कार्ड दाखल व्हायची.जळगावच्या मुख्य पोस्ट कार्यालयाकडून तीन महिन्यांपूर्वी मागणी करुनही विभागीय भांडाराकडून पोस्ट कार्ड मिळालेली नाहीत. नागरिकांची मागणी घटल्याने पोस्ट विभागाने पोस्ट कार्डची छपाई केली नसल्याची माहिती आहे.