जळगाव - जिल्ह्यात गेल्या २ दिवसांपासून सर्वदूर जोरदार पाऊस सुरू आहे. बहुप्रतीक्षेनंतर दाखल झालेल्या पावसामुळे पिकांना नवसंजीवनी मिळाली आहे. शेतातील दुबार पेरणीचे संकट टळले आहे. त्यामुळे शेतकरीवर्गात समाधानाचे वातावरण निर्माण झाले आहे.
बहुप्रतीक्षेनंतर दाखल झालेल्या पावसामुळे पिकांना नवसंजीवनी मिळाली
जळगाव जिल्ह्यात शुक्रवारी रात्रीपासून पावसाचे आगमन झाले. शनिवारी आणि रविवारी दिवसभर पाऊस सुरू राहिला. गेल्या दोन दिवसांत जळगाव, भुसावळ, जामनेर, चोपडा, अमळनेर या तालुक्यांमध्ये जोरदार पाऊस झाला आहे. या पावसामुळे जामनेर तालुक्यातील तोंडापूर धरण १०० टक्के भरले आहे. तापी नदीच्या पाणलोट क्षेत्रात झालेल्या दमदार पावसामुळे रविवारी दुपारनंतर भुसावळ तालुक्यातील हतनूर धरणाचे ३६ दरवाजे अर्धा मीटरने उघडण्यात आले. या पावसामुळे पिकांना जीवनदान मिळाले आहे. सध्या शेतांमध्ये वाफसा नसल्याने पिकांना खतांची मात्रा देण्याची कामे सुरू आहेत. या पावसामुळे जिल्ह्यातील लघू, मध्यम तसेच मोठ्या प्रकल्पांमध्ये काही अंशी जलसाठा वाढला आहे. नद्या, नाल्यांना पाणी आल्याने विहिरींचा पाणीसाठा वाढला आहे.
हतनूर धरणाचे ३६ दरवाजे अर्धा मीटरने उघडले-