जळगाव- जिल्ह्यातील मुक्ताईनगर तालुक्यातील कुऱ्हाकाकोडा येथे मंगळवारी पहाटेच्या सुमारास चोरट्यांनी एका किराणा दुकानाचे शटर वाकवून दुकानातून हजारो रुपयांची रोकड आणि काही किराणा माल चोरून नेला. येथे चोरट्यांनी अक्षरशः धुमाकूळ घातला आहे. गावातील भरचौकात असलेल्या दुकानांमध्ये सातत्याने चोऱ्या होत आहेत. दरम्यान, चोरी करणारे तिघे चोरटे दुकानातील सीसीटीव्हीत कैद झाले आहेत.
तीन चोरटे सीसीटीव्हीत कैद
कुऱ्हाकाकोडा येथे असलेल्या वडोदा वनक्षेत्र कार्यालयासमोर गजानन ढोले यांच्या मालकीचे गजानन प्रोव्हिजन नावाने किराणा दुकान आहे. या दुकानात ही चोरी झाली आहे. चोरट्यांनी दुकानाचे शटर वाकवून आत प्रवेश करत रोकड लांबवली. सकाळी दुकान मालक गजानन ढोले हे नेहमीप्रमाणे दुकान उघडण्यासाठी आले असता त्यांना दुकानाच्या शटरचे लॉक तोडलेले दिसले. त्यांनी लागलीच पोलिसांना या घटनेची माहिती दिली.