महाराष्ट्र

maharashtra

By

Published : Feb 12, 2021, 7:29 AM IST

ETV Bharat / state

राष्ट्रवादी काँग्रेसच्या बॅनरवरून एकनाथ खडसेंचा फोटो गायब; प्रदेशाध्यक्षांच्या दौऱ्यातच गटबाजी उघड?

राष्ट्रवादी काँग्रेसचे प्रदेशाध्यक्ष जयंत पाटील हे सध्या राष्ट्रवादी परिवार संवाद यात्रेनिमित्त राज्यभर दौरा करत आहेत. याच अनुषंगाने, ते गुरुवारी जिल्ह्यात दाखल झाले. त्यांच्या स्वागतासाठी माजीमंत्री गुलाबराव देवकर यांनी पक्षाच्या जिल्हा कार्यालयाबाहेर भलेमोठे बॅनर लावले. या बॅनरवर एकनाथ खडसे यांचा फोटो मात्र, वगळण्यात आला आहे. त्यामुळे राष्ट्रवादी काँग्रेसमध्ये गटबाजी असल्याची एकच चर्चा सुरू झाली...

Photo of Eknath Khadse missing from banners of NCP in Jalgaon
राष्ट्रवादी काँग्रेसच्या बॅनरवरून एकनाथ खडसेंचा फोटो गायब; प्रदेशाध्यक्षांच्या दौऱ्यातच गटबाजी उघड?

जळगाव : माजी मंत्री एकनाथ खडसे हे तीन महिन्यांपूर्वी भाजप सोडून राष्ट्रवादी काँग्रेसमध्ये दाखल झालेले आहेत. मात्र, त्यांचा पक्षप्रवेश राष्ट्रवादी काँग्रेसच्या स्थानिक नेत्यांना फारसा रुचलेला नसल्याचे चित्र आहे. हीच बाब अधोरेखित करणारा एक प्रकार गुरुवारी रात्री समोर आला आहे. राष्ट्रवादी काँग्रेसचे माजीमंत्री गुलाबराव देवकर यांनी प्रदेशाध्यक्ष जयंत पाटील यांच्या स्वागतासाठी पक्षाच्या जिल्हा कार्यालयाबाहेर लावलेल्या बॅनरवरून चक्क एकनाथ खडसे यांच्या फोटोला स्थान देण्यात आलेले नाही. याच विषयावरून राष्ट्रवादी काँग्रेसमध्ये गटबाजी असल्याची चर्चा सुरू झाली आहे.

राष्ट्रवादी काँग्रेसचे प्रदेशाध्यक्ष जयंत पाटील हे सध्या राष्ट्रवादी परिवार संवाद यात्रेनिमित्त राज्यभर दौरा करत आहेत. याच अनुषंगाने, ते गुरुवारी जिल्ह्यात दाखल झाले. त्यांच्या स्वागतासाठी माजीमंत्री गुलाबराव देवकर यांनी पक्षाच्या जिल्हा कार्यालयाबाहेर भलेमोठे बॅनर लावले. या बॅनरवर एकनाथ खडसे यांचा फोटो मात्र, वगळण्यात आला आहे. त्यामुळे राष्ट्रवादी काँग्रेसमध्ये गटबाजी असल्याची एकच चर्चा सुरू झाली. या साऱ्या घडामोडींमुळे खडसे समर्थक नाराज झाल्याचे बोलले जात आहे.

खडसे समर्थकांनी लावलेल्या बॅनरवर मात्र खडसेंचा फोटो..

दुसरीकडे, प्रदेशाध्यक्ष जयंत पाटील यांच्या स्वागतासाठी खडसे समर्थकांनी देखील शहरात बॅनर लावले आहेत. मात्र, या बॅनरवर खडसे यांच्यासह त्यांच्या कन्या ॲड. रोहिणी खडसे-खेवलकर यांचे फोटो आहेत. त्यामुळे देवकर यांनी लावलेल्या बॅनरवर खडसेंचा फोटो मुद्दाम डावलला का? याबाबत स्पष्टता होऊ शकलेली नाही.

'तेव्हा'ही नेत्यांनी फिरवली होती पाठ..

एकनाथ खडसे यांनी मुंबईत पक्षाचे अध्यक्ष शरद पवार यांच्या उपस्थितीत भाजप सोडून राष्ट्रवादीत प्रवेश केला होता. राष्ट्रवादीत दाखल झाल्यानंतर खडसे पहिल्यांदा पक्षाच्या जिल्हा कार्यालयात आले होते. त्यावेळी खडसेंचे स्वागत करण्यासाठी आयोजित कार्यक्रमाकडे स्थानिक नेत्यांनी पाठ फिरवली होती. यावेळी देखील राष्ट्रवादी काँग्रेसच्या गटबाजीबाबत चर्चा सुरू झाली होती.

हेही वाचा :विधानसभेचे अध्यक्षपद हे काँग्रेसकडेच राहिल - बाळासाहेब थोरात

ABOUT THE AUTHOR

...view details