धक्कादायक! जळगाव जिल्हा रुग्णालयात कोरोना रुग्णांजवळ नातेवाईकांचा सर्रास वावर

ईटीव्ही भारत प्रतिनिधीने केलेल्या पडताळणीत जळगाव कोविड-रुग्णालयात कोरोनाबाधित रुग्णांवर उपचार सुरू असणाऱ्या अनेक वॉर्डांमध्ये त्यांच्या नातेवाईकांचा सर्रासपणे वावर सुरू असल्याचे दिसून आले. तसेच याठिकाणी ना सुरक्षारक्षक कोणाला हटकत होते, ना पोलीस कोणाला रोखत होते. जिल्हा रुग्णालयाच्या अशा बेफिकिरीमुळे कोरोनाचा संसर्ग आणखीन वाढण्याची शक्यता नाकारता येत नाही.

जळगाव -जिल्ह्यातील कोविड रुग्णालय अर्थात जळगाव जिल्हा रुग्णालयात प्रशासनाच्या हलगर्जीपणाचे अनेक किस्से समोर येत आहेत. त्याबाबत अनके तक्रारीही होत आहेत. परंतु, रुग्णालय प्रशासन अद्यापही गंभीर नसून, सर्वसामान्य नागरिकांच्या जीवाशी खेळ सुरू असल्यातचे दिसून येत आहे. ईटीव्ही भारतने गुरुवारी या रुग्णालयात केलेल्या पडताळणीत या कोविड रुग्णालयातील हलगर्जीपणाचे पितळ उघड झाले आहे.

कोरोनाबाधित रुग्णांवर उपचार सुरू असणाऱ्या अनेक वॉर्डांमध्ये त्यांच्या नातेवाईकांचा सर्रासपणे वावर सुरू असल्याचे दिसून आले. तसेच याठिकाणी ना सुरक्षारक्षक कोणाला हटकत होते, ना पोलीस कोणाला रोखत होते. दिवस आणि रात्रभर अनेक वॉर्डांमध्ये नातेवाईक आपल्या कोरोनाबाधित आप्तेष्टांची शुश्रूषा करताना दिसून येत आहेत. जिल्हा रुग्णालयाच्या अशा बेफिकिरीमुळे कोरोनाचा संसर्ग आणखीन वाढण्याची शक्यता नाकारता येत नाही.

जळगाव जिल्ह्यात कोरोनाचा संसर्ग अतिशय वेगाने सुरू आहे. सद्य स्थितीत जिल्ह्यातील कोरोना संसर्गग्रस्त रुग्णांची संख्या 3 हजारांच्या उंबरठ्यावर आहे. एवढी गंभीर परिस्थिती असूनही कोविड रुग्णालय प्रशासनाला गांभीर्य असल्याचे दिसत नाही. कोरोनाबाधित रुग्ण रुग्णालयातून बेपत्ता होणे, कोरोनाबाधित रुग्णांच्या उपचारातील हलगर्जीपणा, कोरोनाबाधित मृतांचे मृतदेह नातेवाईकांना सुपूर्द करणे, असे अनेक प्रकार याठिकाणी सातत्याने घडले आहेत. इतकेच नाही तर 2 आठवड्यांपूर्वी एका 83 वर्षीय कोरोनाबाधित वृद्धा बेपत्ता झाल्यानंतर तिचा मृतदेह वॉर्डातील शौचालयात आढळला होता. या घटनेमुळे कोविड रुग्णालयातील अनागोंदी समोर आली होती. यानंतर उपाययोजनांमध्ये सुधारणा होणे, अपेक्षित असतानाही तशी कोणत्याही प्रकारची सुधारणा झालेली दिसत नाही.

हेही वाचा...मागील २४ तासात आजवरचे सर्वाधिक रुग्ण आढळले, 16 हजार 922 कोरोनाबाधितांची वाढ

शासनाने अधिग्रहित केलेल्या डॉ. उल्हास पाटील मेडिकल कॉलेजमध्येही दोन दिवसांपूर्वी असाच काहीसा धक्कादायक प्रकार घडला. याठिकाणी मृत्यू झालेल्या एका बाधित रुग्णाचा मृतदेह अंत्यसंस्कारासाठी चक्क नातेवाईकांच्या स्वाधीन करण्यात आला. या घटनेनंतर जिल्हा प्रशासनाने हलगर्जीपणा करणाऱ्यांवर कठोर कारवाई करण्याऐवजी जबाबदारीचे खापर महापालिकेच्या आरोग्य यंत्रणेवर फोडले. या साऱ्या अनागोंदीच्या पार्श्वभूमीवर 'ई-टीव्ही भारत'ने गुरुवारी दुपारी कोविड रुग्णालयात पाहणी केली. त्यात रुग्णालयातील सुरक्षा यंत्रणेतील त्रुटींचे पितळ उघडे पडले. कोरोना पॉझिटिव्ह रुग्णांवर ज्या ठिकाणी उपचार केले जातात, त्या ठिकाणी रुग्णांचे नातेवाईक सर्रासपणे ये-जा करत असल्याचे दिसून आले.

हे कमी म्हणून की काय अनेकजण आपल्या आप्तेष्टांना जेवण देणे, पाणी पाजणे, गोळ्या-औषधी देत असल्याचेही 'ई-टीव्ही भारत'च्या कॅमेऱ्यात कैद झाले. धक्कादायक बाब म्हणजे, रुग्णांचे नातेवाईक पीपीई किट, डोळ्यांना गॉगल अशा कोणत्याही प्रकारच्या सुरक्षा साधनांऐवजी कोरोना वॉर्डात फिरतात. यामुळे कोरोनाचा संसर्ग बळावण्याची दाट शक्यता आहे.

ईटीव्ही भारत प्रतिनिधीकडून वास्तव उघड...

'ई-टीव्ही भारत'च्या प्रतिनिधीने कोविड रुग्णालयात प्रवेश केल्यानंतर रुग्णालयाच्या आतील बाजूस रुग्णांचे नातेवाईक फिरत असल्याचे नजरेस पडले. त्यानंतर प्रतिनिधी अधिष्ठाता दालनाकडून वॉर्ड क्रमांक 1 मध्ये शिरला. याठिकाणी देखील रुग्णांचे काही नातेवाईक होते. ते वॉर्डात ये-जा करत होते. आत काय सुरू आहे हे? पाहण्यासाठी प्रतिनिधी आत जायला लागला तेव्हा तेथील एका परिचारिकेने मज्जाव केला. मात्र, रुग्णांचे नातेवाईक आत सर्रासपणे कसे फिरत आहेत, अशी विचारणा केल्यावर परिचारिकेची बोलती बंद झाली.

त्यानंतर 'ई- टीव्ही भारत'च्या प्रतिनिधीने वरच्या मजल्याकडे मोर्चा वळवला. तेथील वॉर्ड क्रमांक-7 मध्ये काही नातेवाईक रुग्णांना जेवण देत होते. कोणी पाणी पाजत होते. तर कोणी गप्पा करत होते. येथील परिस्थिती कॅमेऱ्यात टिपल्यानंतर प्रतिनिधी वॉर्ड क्रमांक-8 मध्ये गेला असता, तेथील परिस्थितीही धक्कादायक होती. एक व्यक्ती कोरोनाबाधित आईला गोळ्या देत होता. दुसरे दोन जण देखील इतर रुग्णांशी गप्पा मारत होते. एकूणच कोविड रुग्णालयात सुरक्षेच्या बाबतीत खूपच दिरंगाई सुरूच असल्याचे दिसून आले.

हेही वाचा...ऑनलाईन शिक्षणाला फाटा; पालकांनी सुरू केला नाशिकचा 'होम स्कुलींग' पॅटर्न

रुग्णालयाच्या पडलेल्या भिंतीतून वॉर्ड क्रमांक-1 मध्ये करता येतो प्रवेश

या पाहणीत अजून एक धक्कादायक बाब समोर आली. अधिष्ठाता कार्यालयाच्या मागील बाजूस वॉर्ड क्रमांक 1च्या पोर्चची भिंत पडली आहे. येथून थेट वॉर्डात प्रवेश करता येतो. कोविड रुग्णालयाच्या मुख्य प्रवेशद्वाराजवळ पोलीस कर्मचारी तसेच सुरक्षारक्षक असल्याने रुग्णांचे नातेवाईक याच तुटलेल्या भिंतीतून वॉर्डात प्रवेश करतात. ही बाब मुख्य प्रवेशद्वारावर असलेल्या सुरक्षारक्षकांना माहिती होत नाही. रुग्णांना जेवण, गोळ्या-औषधी दिल्यानंतर व्यक्ती तेथूनच बाहेर पडतो. हा सारा प्रकार वॉर्डातील परिचारिका, डॉक्टर्स यांच्या डोळ्यासमोर घडतो. परंतु, कुणीही हटकत नाही.

रुग्णांना सुविधा मिळत नसल्याच्या तक्रारी

कोविड रुग्णालयात दाखल होणाऱ्या रुग्णांना आवश्यक त्या सोईसुविधा मिळत नसल्याच्या तक्रारी आहेत. रुग्णांना वेळेवर नाष्टा, जेवण मिळत नाही. त्यामुळे अनेक रुग्णांचे नातेवाईक घरून नाष्टा आणि जेवण आणून रुग्णांना देतात. हृदयरोग, उच्च रक्तदाब, मधुमेह असे गंभीर आजार असलेल्या कोरोनाबाधित रुग्णांना पूर्वीच्या आजारांची औषधी देखील वेळेवर देण्याकडे नर्सिंग स्टाफचे लक्ष नसते. म्हणून रुग्णांचे नातेवाईक स्वतः आप्तेष्टांची शुश्रूषा करण्यासाठी कोविड रुग्णालयात येत असल्याचे दिसून येत आहे.

जिल्हाधिकारी लक्ष देतील का?

दरम्यान, कोविड रुग्णालयातील हलगर्जीपणाचे अनेक किस्से समोर आल्यानंतर रुग्णालयाचे अधिष्ठाता, जिल्हाधिकारी यांची नुकतीच बदली झाली आहे. आता दोन्ही पदांवर नवे अधिकारी रुजू झाल्यानंतरही परिस्थितीत सुधारणा नाहीये. जिल्हाधिकारी म्हणून नव्यानेच रुजू झालेले अभिजित राऊत कोविड रुग्णालयातील अनागोंदीकडे लक्ष देतील का? हा खरा प्रश्न आहे. त्यांनी जिल्हाधिकारी म्हणून कमान सांभाळल्यानंतर रात्रीच्या वेळी आकस्मिक भेट देणे, आढावा बैठका घेणे असा सोपस्कार पार पाडत आहेत. मात्र, रुग्णालयातील भोंगळ कारभारात ते सुसूत्रता आणतील का? हे पाहणे महत्त्वाचे आहे. आरोग्य यंत्रणाच गंभीर नसल्याने जिल्ह्यात कोरोनाचा संसर्ग वेगाने फैलावत आहे, हे अधोरेखित झाले आहे.

महत्वाचे म्हणजे ईटीव्ही भारतच्या प्रतिनिधीने रुग्णालयाचे अधिष्ठाता आणि जिल्हाधिकारी अभिजित राऊत यांच्याशी याबाबतीत संपर्क साधण्याचा प्रयत्न केला असता, त्यांनी कोणताही प्रतिसाद आणि प्रतिक्रिया देणे टाळले आहे.