जळगाव - युतीबाबत दोन्ही पक्षांचे वरिष्ठ नेते प्रयत्नशील असताना जलसंपदामंत्री गिरीश महाजन यांनी शिवसेनेवर जोरदार निशाणा साधला आहे. दोन्ही पक्षांमध्ये युती व्हावी, अशी आमची प्रामाणिक इच्छा आहे. त्यासाठी आम्ही प्रयत्नदेखील करत आहोत. मात्र, युती झाली नाही, तर आम्हीही लंगोट बांधू, अंगाला तेल लावू, कुस्ती खेळू आणि जिंकूही, अशा शब्दात महाजन यांनी शिवसेनेला फटकारले आहे. ते सार्वजनिक शिवजयंती महोत्सव समितीच्या बैठकीसाठी जळगावात आले होते. त्यावेळी पत्रकारांसोबत संवाद साधताना महाजन यांनी हे वक्तव्य केले.
यावेळी बोलताना महाजन यांनी राज्याचे सहकार राज्यमंत्री गुलाबराव पाटील यांच्यावरही टीका केली. गुलाबराव पाटील यांनी काही दिवसांपूर्वी 'युती झाली नाही, तर आम्ही लंगोट बांधून तयार आहोत', असे वक्तव्य केले होते. त्याचा संदर्भ देत गिरीश महाजन म्हणाले की, गुलाबराव पाटील हे मोठे पहिलवान आहेत. ते नेहमी आपल्या खिशात लंगोट ठेऊन फिरतात. युती संदर्भात दोन्ही बाजूंनी सकारात्मक चर्चा सुरू आहे. युतीचा विषय त्यांच्या किंवा माझ्या हातात नाही. त्याबाबत टीका-टिप्पणी करणे आता योग्य नाही. अजून आम्ही लंगोट वैगरे काढलेला नाही आणि शिवलेला पण नाही. परंतु, जर युती झाली नाही तर मात्र, आमच्याकडे लंगोटचा कापड तयारच असतो. त्याला शिवायला फार वेळ लागत नाही, असेही महाजन म्हणाले. कुस्ती आम्हीच जिंकू -
दोन्ही पक्षांमध्ये युती व्हावी, अशी आमची प्रामाणिक इच्छा आहे. त्यासाठी आम्ही प्रयत्नदेखील करत आहोत. मात्र, युती झाली नाही तर आम्हीही लंगोट बांधू, अंगाला तेल लावू, कुस्ती खेळून जिंकूही, असा आत्मविश्वास देखील महाजन यांनी व्यक्त केला.
