जळगाव - रावेर तालुक्यातील बोरखेडा शिवारात असलेल्या एका शेतात अज्ञातांनी चार भावंडांची निर्घृण हत्या केली. हा खळबळजनक प्रकार आज सकाळी उघडकीस आला. या हत्याकांडामुळे संपूर्ण जिल्हा हादरला आहे.
हत्येचे कारण अस्पष्ट -
सईता भिलाला (वय १२), रावल भिलाला (वय ११), अनिल भिलाला (वय ८) आणि सुमन ऊर्फ नानी (वय ३) अशी हत्या झालेल्या चौघांची नावे आहेत. या चौघांची हत्या नेमकी का झाली? याचे कारण समोर आलेले नाही. घटनास्थळी असलेली परिस्थिती पाहता हे हत्याकांड चोरीच्या उद्देशाने झाल्याचेही दिसून येत नाही. आज अमावस्या असल्याने बुवाबाजी किंवा अंधश्रद्धेतून हे हत्याकांड झाले असावे, असा अंदाज वर्तवला जात आहे. अद्याप याबाबत कोणत्याही प्रकारचे पुरावे घटनास्थळी मिळालेली नाहीत. त्यामुळे या हत्याकांडाचा उलगडा करण्याचे मोठे आव्हान पोलीस यंत्रणेसमोर आहे.
रावेर शहरापासून काही अंतरावर बोरगाव शिवारात शेख मुश्ताक यांचे शेत आहे. मागील अनेक वर्षांपासून शेख यांच्या शेतात मयताब भिलाला हे आपली पत्नी, दोन मुली आणि तीन मुलांसोबत राहतात. नातेवाइकांच्या दशक्रिया विधीसाठी भिलाला हे पत्नी आणि एका मुलासह १५ ऑक्टोबर रोजी मध्य प्रदेशात गेले होते. त्यांची दोन मुले आणि दोन मुली घरीच होते. शुक्रवारी सकाळी शेतमालक शेख मुश्ताक हे शेतात आल्यानंतर त्यांना घर बंद दिसले. त्यामुळे त्यांनी आवाज देत डोकावून पाहिले असता, घरात भिलाला यांची चारही मुले रक्ताच्या थारोळ्यात पडलेले दिसले. ही घटना समोर आल्यानंतर शेख यांनी तातडीने रावेर पोलिसांना माहिती दिली. घटनेची माहिती मिळाल्यानंतर पोलिसांनी लागलीच घटनास्थळी धाव घेतली. घटनास्थळी पुराव्यांचे संकलन करण्यासाठी श्वानपथक तसेच फॉरेन्सिक लॅबचे पथकही दाखल झाले आहे.