जळगाव- टोमॅटोने भरलेली मालवाहतूक चारचाकी गाडीला रस्त्यात अडवल्यानंतर चार जणांनी चाकूचा धाक दाखवून चालक व क्लिनरला लुटले होते. ही घटना गुरुवारी मध्यरात्री शिरसोली रस्त्यावर घडली होती. याबाबत एमआयडीसी पोलिसात गुन्हा दाखल असून, शुक्रवारी पोलिसांनी तपासचक्रे फिरवत लुटमार करणाऱ्या तीन तरुणांना अटक केली. त्यांच्यासोबत एका अल्पवयीन साथीदारालाही ताब्यात घेतले आहे.
औरंगाबाद जिल्ह्यातील कन्नड येथील रहिवासी ज्ञानेश्वर बिसन शिसे यांच्या मालकीच्या मालवाहतूक चारचाकी वाहनावर (एमएच २० डीई ३३४९) विकास सुरेश गायके (वय २१, रा. कन्नड, जि. औरंगाबाद) हा चालक म्हणून कामाला आहे. ९ जुलै रोजी रात्री ९ वाजेच्या सुमारास गावातील शेतकऱ्यांचे टमाटे घेवून जळगाव येथे विक्री करण्यासाठी विकास हा कन्नड येथून निघाला होता. त्याच्यासोबत अजय नावाचा क्लिनर होता. रात्री १२.३० वाजेच्या सुमारास जळगाव शहरातील कृष्णा लॉन्स मंगल कार्यालयाजवळ अज्ञात चार तरूणांनी रस्त्यात दुचाकी आडवी लावून विकास यांची चारचाकी थांबविली. त्यातील एकाने चारचाकी चालक विकास आणि क्लिनर अजय यांना मारहाण करून दोघांकडून रोकड लुटली होती.