पारोळ्यातील भीषण आगीत तीन दुकाने खाक; दीड कोटी रुपयांचे नुकसान

पारोळा शहरातील प्रमुख बाजारपेठेत गाव होळी चौकात सुनील भालेराव यांच्या मालकीचे शिरसमणीकर ज्वेलर्स नावाचे सराफाचे दुकान आहे. या दुकानाला शॉर्टसर्किटने आग लागली. आग भडकल्याने या दुकानशेजारी असलेल्या सारस्वत किराणा व सुनील ड्रेसेस या दुकानांना देखील आग लागली.

जळगाव -पारोळा शहरातील प्रमुख बाजारपेठेत 3 दुकाने बुधवारी सकाळी भीषण आगीत खाक झाली. शॉर्टसर्किटने ज्वेलर्सच्या दुकानाला लागलेली आग क्षणातच भडकल्याने आगीने शेजारी असलेल्या किराणा व कपड्यांच्या दुकानालाही कवेत घेतले. या दुर्घटनेत तीनही दुकानांचे सुमारे दीड कोटी रुपयांचे नुकसान झाले आहे.

पारोळा शहरातील प्रमुख बाजारपेठेत गाव होळी चौकात सुनील भालेराव यांच्या मालकीचे शिरसमणीकर ज्वेलर्स नावाचे सराफाचे दुकान आहे. या दुकानाला शॉर्टसर्किटने आग लागली. त्यानंतर आग भडकल्याने या दुकानशेजारी असलेल्या सारस्वत किराणा व सुनील ड्रेसेस या दुकानांना देखील आग लागली. आग लवकर आटोक्यात न आल्याने तीनही दुकाने जळून खाक झाली. या घटनेत राधिका ज्वेलर्स या दुकानाचेही नुकसान झाले आहे.

स्वप्नांची क्षणात राखरांगोळी -

शिरसमणीकर ज्वेलर्सचे मालक सुनील भालेराव यांनी १२ लाख रुपये कर्ज काढून आपल्या जुन्या दुकानाचे नुतनीकरण केले होते. या नंतर २६ जानेवारीपासून नव्या दुकानाचा शुभारंभ झाला होता. दोन महिन्यातच नव्या दुकानासह भालेराव यांच्या स्वप्नांची राखरांगोळी झाली. दुकान जळताना पाहून भालेराव यांना भोवळ आली.

आमदारांकडून दुकान मालकांना आर्थिक मदत -

या दुर्घटनेनंतर आमदार डॉ. सतीश पाटील यांनी घटनास्थळी भेट देऊन आगीत खाक झालेल्या दुकान मालकांना प्रत्येकी 25 हजार रुपयांची आर्थिक मदत दिली. शहरात एवढी मोठी दुर्घटना घडलेली असताना महावितरण कंपनीचे अधिकारी घटनास्थळी भेट देत नाहीत, या कारणावरून आमदार पाटील यांनी महावितरण कंपनीच्या अधिकाऱ्यांना धारेवर धरले.