जळगाव- माजी सैनिकाला मारहाण करत त्यांच्यावर प्राणघातक हल्ला केल्याप्रकरणी चाळीसगावचे आमदार उन्मेष पाटील यांच्यासह नऊ जणांविरुद्ध न्यायालयाच्या आदेशानंतर आज (मंगळवार) चाळीसगाव शहर पोलीस ठाण्यात गुन्हा दाखल करण्यात आला आहे. उन्मेष पाटील हे चाळीसगावचे विद्यमान आमदार असून २०१९ च्या लोकसभा निवडणुकीत जळगाव लोकसभा मतदारसंघाचे भाजपचे ते उमेदवार आहेत.
टाकळी प्र.चा. भागातील रहिवासी असलेले माजी सैनिक सोनू हिंमत महाजन यांच्यावर तीन वर्षांपूर्वी झालेल्या प्राणघातक हल्ल्याप्रकरणी चाळीसगाव पोलिसांनी फिर्याद नोंदवून घेतली नव्हती. त्यामुळे महाजन यांनी मुंबई उच्च न्यायालयाच्या औरंगाबाद खंडपीठात धाव घेतली होती. याप्रकरणी ६ जूनपर्यंत चौकशी करून महाजन यांची फिर्याद नोंदवून घेण्यात यावी व न्यायालयाला अहवाल सादर करण्यात यावा, असे आदेश खंडपीठाने दिले होते. त्यानुसार पोलिसांनी चौकशी करून आज या प्रकरणातील नऊ जणांविरुद्ध मारहाण, जीवे मारण्याचा प्रयत्न तसेच दरोड्याचा गुन्हा दाखल केला आहे.