शेतकरी आणि कामगारविरोधी धोरणांचा निषेध करण्यासाठी काँग्रेसची ट्रॅक्टर रॅली

केंद्र सरकारने कामगार आणि शेतकऱ्यांसाठी केलेला नवा कायदा हा जाचक असल्याचा आरोप करत, आज कॉंग्रेसच्या वतीने जिल्हाधिकारी कार्यालयावर ट्रॅक्टर रॅली काढण्यात आली. यावेळी आंदोलकांनी सरकार विरोधात जोरदार घोषणाबाजी केली.

जळगाव -केंद्र सरकारने नुकत्याच मंजूर केलेल्या शेतकरी आणि कामगार सुधारणा कायद्याच्या मुद्द्यावरून देशभरात विरोधकांनी रान पेटवले आहे. या कायद्यांमुळे शेतकरी तसेच कामगार देशोधडीला लागतील. त्यामुळे हे कायदे मागे घ्यावेत, अशी विरोधकांची मागणी आहे. याच मागणीसाठी सोमवारी जळगावात काँग्रेसच्या वतीने ट्रॅक्टर रॅली काढण्यात आली. या रॅलीच्या माध्यमातून काँग्रेसने केंद्र सरकारचा निषेध केला.

शहरातील काँग्रेस भवनापासून दुपारी 3 वाजता या ट्रॅक्टर रॅलीला सुरुवात झाली. ही रॅली टॉवर चौक, नेहरू चौक, शिवतीर्थ मैदान, जिल्हा क्रीडा संकुल, नवीन बसस्थानक, स्वातंत्र्य चौकमार्गे थेट जिल्हाधिकारी कार्यालयावर धडकली. या रॅलीत काँग्रेसचे प्रदेश उपाध्यक्ष तथा माजी खासदार डॉ. उल्हास पाटील, जळगाव जिल्ह्याचे निरीक्षक प्रकाश मुगदिया, जिल्हाध्यक्ष ऍड. संदीप पाटील, प्रदेश सचिव डी. जी. पाटील, एनएसयुआयचे जिल्हाध्यक्ष देवेंद्र मराठे यांच्यासह काँग्रेसचे जिल्हभरातील पदाधिकारी तसेच कार्यकर्ते मोठ्या संख्येने सहभागी झाले होते. महिला देखील मोठ्या संख्येन या रॅलीत सहभागी झाल्या होत्या.

रॅलीत केंद्र सरकारच्या विरोधात घोषणाबाजी

रॅलीत सहभागी प्रत्येक ट्रॅक्टरवर केंद्र सरकारच्या विरोधात घोषणा असलेले फलक लावण्यात आले होते. रॅलीदरम्यान आंदोलकांनी केंद्र सरकारची धोरणे, शेतकरी तसेच कामगार विरोधी कायद्यांच्या विरोधात जोरदार घोषणाबाजी केली. रॅली जिल्हाधिकारी कार्यालयावर आल्यानंतर त्या ठिकाणी काँग्रेसच्या स्थानिक नेत्यांनी भाषणे केली.

सरकारने तातडीने कायदे रद्द करावेत

यावेळी भाषण करताना काँग्रेसचे जिल्हाध्यक्ष ऍड. संदीप पाटील म्हणाले की, केंद्र सरकारने संसदेत मंजूर केलेले कायदे हे शेतकरी आणि कामगार विरोधी कायदे आहेत. या कायद्यामुळे शेतकरी तसेच कामगार देशोधडीला लागणार आहेत. केंद्र सरकारने हे कायदे मंजूर करताना सर्वसामान्य जनतेचे हित लक्षात घेतले नाही. त्यामुळे हे कायदे तातडीने मागे घेण्याची गरज आहेत. हे कायदे जोपर्यंत मागे घेतले जात नाही, तोपर्यंत काँग्रेसच्या वतीने आंदोलन करण्यात येईल.

ट्रॅक्टर रॅली संदर्भात भूमिका मांडताना प्रदेश उपाध्यक्ष डॉ. उल्हास पाटील म्हणाले की, केंद्र सरकार हे सर्वसामान्य जनतेच्या मुळावर उठलेले आहे. या सरकारला कॉर्पोरेट राज आणायचे आहे. त्यामुळे शेतकरी आणि कामगारांच्या विरोधी कायदे केले जात आहेत. सर्व सामान्य जनतेच्या विरोधात हे सरकार आहे. त्यामुळे या सरकारच्या विरोधात आंदोलनाच्या माध्यमातून जनतेचा राग व्यक्त होत आहे.

हेही वाचा -केडीएमसीच्या अखेरच्या महासभेत दोन तास तांत्रिक गोंधळ..

हेही वाचा -नागपूर विभाग पदवीधर निवडणूक: महापौर संदीप जोशी भाजपाचे उमेदवार