स्नेहसंमेलनातून विद्यार्थ्यांना भूतदयेचे धडे, जळगावातील सरस्वती विद्यालयाचा उपक्रम

विद्यार्थ्यांच्या अंगी असलेल्या कलागुणांना वाव मिळावा. तसेच त्यांच्यावर चांगले संस्कार रुजावेत, या उद्देशाने सरस्वती विद्यालयातर्फे दरवर्षी स्नेहसंमेलन आयोजित केले जाते.

जळगाव - शहरातील संत तुलसी विद्याप्रसारक मंडळ संचालित सरस्वती विद्यामंदिर व माध्यमिक विद्यालयाचे वार्षिक स्नेहसंमेलन मोठ्या उत्साहात पार पडले. या स्नेह संमेलनातून विद्यार्थ्यांना मुक्या प्राण्यांविषयी भूतदयेचे धडे देण्यात आले. सध्या उन्हाचा कडाका वाढला आहे. पक्षांना पाण्याची सोय व्हावी, म्हणून विद्यार्थ्यांनी विद्यालयाच्या आवारातील झाडांवर पाण्याची भांडी लावली आहेत.

विद्यार्थ्यांच्या अंगी असलेल्या कलागुणांना वाव मिळावा. तसेच त्यांच्यावर चांगले संस्कार रुजावेत, या उद्देशाने सरस्वती विद्यालयातर्फे दरवर्षी स्नेहसंमेलन आयोजित केले जाते. या वर्षीच्या स्नेहसंमेलनाची संकल्पना जरा वेगळी होती. स्नेहसंमेलनात विद्यार्थ्यांनी आपल्या अंगी असलेल्या कलागुणांचे सादरीकरण करत उपस्थितांची वाहवा मिळवली.

स्वराज्यभिषेकाचा प्रसंग केला सादर -

स्नेहसंमेलनात काही विद्यार्थ्यांनी स्वराज्यभिषेकाचा प्रसंग सादर केला. विद्यार्थ्यांच्या अप्रतिम सादरीकरणाने प्रत्यक्ष शिवशाही अवतरल्याची प्रचिती आली.

वार्षिक पारितोषिक वितरण -

यावेळी गुणवंत विद्यार्थ्यांना मान्यवरांच्या हस्ते पारितोषिक वितरण करण्यात आले. वर्षभरात विविध परीक्षा तसेच स्पर्धांमध्ये यश मिळवणाऱ्या विद्यार्थ्यांना गौरविण्यात आले.

विद्यार्थ्यांनी घेतली शपथ -

सध्या उन्हाचा तडाखा वाढला आहे. त्यामुळे मनुष्यासह पशु व पक्षांच्या जिवाची पाण्यासाठी काहिली होत आहे. मनुष्य कोठूनही पाण्याची सोय करू शकतो. परंतु पक्षी तसे करू शकत नाहीत. म्हणून, पक्षांसाठी विद्यार्थ्यांनी शाळेच्या आवारात असलेल्या झाडांवर पाण्याची भांडी लावली आहेत. पाण्याचा अपव्यय करणार नाही व करू देणार नाही अशी शपथही यावेळी विद्यार्थ्यांनी घेतली. आपल्या पालकांना देखील विद्यार्थ्यांनी पाण्याच्या बचतीचे तसेच पक्ष्यांसाठी पाणी ठेवण्याचे आवाहन केले.