जळगाव - जिल्हा काँग्रेसचे सरचिटणीस आसिफ खान इस्माईल खान यांचा मंगळवारी रात्री अपघाती मृत्यू झाला आहे. औरंगाबाद येथून मुक्ताईनगरला परत येत असताना त्यांच्या कारचा जालना-सिंदखेडराजा मार्गावर अपघात झाला. या अपघातात आसिफ खान यांचा जागीच मृत्यू झाला, तर त्यांचे दोन सहकारी गंभीर जखमी झाले आहेत. या घटनेने हळहळ व्यक्त होत आहे.
आसिफ खान इस्माईल खान हे जळगाव जिल्हा काँग्रेसचे सरचिटणीस होते. ते काँग्रेसचे मुक्ताईनगर तालुका अध्यक्ष आत्माराम जाधव व ऍड. संतोष इंगळे यांच्यासोबत मंगळवारी औरंगाबाद येथे गेले होते. औरंगाबाद येथील काम आटपून ते रात्री त्यांच्या कारने मुक्ताईनगरला परत येत होते. जालना-सिंदखेडराजा मार्गावर त्यांच्या कारला एका ट्रकने जोरदार धडक दिली. या अपघातात आसिफ खान यांचा जागीच मृत्यू झाला. तर, त्यांच्यासोबत असलेले आत्माराम जाधव व ऍड. संतोष इंगळे हे गंभीररित्या जखमी झाले. दोन्ही जखमींना जालना येथील एका खासगी रुग्णालयात उपचारासाठी हलविण्यात आले आहे.