जळगाव - जिल्ह्यात कोरोनाचा संसर्ग वेगाने वाढत आहे. दररोज कोरोनाबाधितांच्या मृत्यूचा आकडाही वाढत आहे. काल दिवसभरात ६ वर्षीय बालिकेसह २० कोरोनाबाधितांचा मृत्यू झाला. काल नव्याने १ हजार ६ रुग्ण समोर आले आहेत. विशेष म्हणजे, काल नवीन आढळलेल्या रुग्णांपेक्षा बरे होणाऱ्या रुग्णांची संख्या जास्त आहे. ही दिलासादायक बाब आहे.
हेही वाचा -जळगावात अल्पवयीन मुलीचा संशयास्पद मृत्यू; अपशकुनी समजून वडील छळ करत असल्याची मामाची तक्रार
जिल्ह्यात कोरोनाची परिस्थिती गंभीर होत आहे. आज जळगाव शहर १७३, जळगाव ग्रामीण ४७, भुसावळ १३०, अमळनेर ६०, चोपडा ९७, पाचोरा ४७, भडगाव ११, धरणगाव ३३, यावल २५, एरंडोल ७३, जामनेर ३८, रावेर ७०, पारोळा २०, चाळीसगाव ५०, मुक्ताईनगर ९०, बोदवड ३५ आणि इतर जिल्ह्यातील ७, असे एकूण १००६ रुग्ण आढळून आले. तर, १ हजार १२५ रुग्ण कोरोनामुक्त झाले आहेत. आतापर्यंत एकूण रुग्णांची संख्या १ लाख १९ हजार ९३४ इतकी झाली आहे. तर, १ लाख ७ हजार २६ रुग्ण कोरोनामुक्त झाले आहेत.