हिंगोली - मुख्यमंत्री उद्धव ठाकरे यांची अतिशय महत्त्वाकांक्षी योजना असलेल्या 'शिवभोजन थाळी'चे हिंगोलीतील जिल्हा सामान्य रुग्णालय परिसरात राज्याच्या शालेय शिक्षणमंत्री तथा हिंगोली जिल्ह्याच्या पालकमंत्री वर्षा गायकवाड यांच्या हस्ते उद्घाटन करण्यात आले. पहिल्याच दिवशी या थाळीचा लाभ घेतलेल्या लाभार्थ्यांने समाधान देखील व्यक्त केले.
दिवसेंदिवस वाढत असलेली देशाची लोकसंख्या आणि वाढत्या महागाईमुळे सर्वसामान्यांना एक वेळचे जेवणदेखील मिळणे कठीण होऊन बसले आहे. अशाच परिस्थितीत कित्येकजण उपाशीपोटी रात्र काढतात. एवढेच नव्हे तर, पोटाची खळगी भरून काढण्यासाठी वाटेल ते काम करणाऱ्यांची देखील संख्या मोठ्या प्रमाणात आहे. तर, काहीजणांना धडपड करून देखील अन्न मिळत नसल्याचे विदारक चित्र आहे. ही परिस्थिती टाळण्यासाठी मुख्यमंत्री उद्धव ठाकरे यांनी १० रुपयात 'शिवभोजन' हा उपक्रम संपूर्ण महाराष्ट्रामध्ये सुरू केला. जिल्हासामान्य रुग्णालय परिसरात रविवारी पालकमंत्री वर्षा गायकवाड यांच्या हस्ते या थाळीचे उद्घाटन करण्यात आले आणि पहिल्याच दिवशी अनेक लाभार्थ्यांनी या थाळीचा लाभ देखील घेतला.