हिंगोलीत वन्यप्राण्यांच्या बंदोबस्तासाठी रिपब्लिकन सेनेचे रास्तारोको

हिंगोली जिल्ह्यातील औंढा नागनात येथे रिपब्लिक सेनेने वन्यप्राण्यांच्या बदोबस्त व्हावा यासाठी आंदोलन केले. यावेळी वनपरिक्षेत्र अधिकाऱ्यांना निवेदान देन्यात आले.

हिंगोली -औंढा नागनाथ येथील जुन्या बसस्थानकाजवळ असलेल्या वन विभागाच्या कार्यालयासमोरील राज्य मार्गावर रिपब्लिक सेनेच्या वतीने वन्यप्राण्यांच्या बंदोबस्तासाठी एक तास रास्ता रोको करण्यात आला. त्यामुळे दोन्ही बाजूंनी वाहनाच्या लांबच लांब रांगा लागल्या होत्या.

जिल्ह्यात खरिपाचा हंगाम सध्या बहरला आहे. मात्र, वन्य प्राणी उभे पिक फस्त करून अतोनात नुकसान करत आहेत. त्यामुळे शेतकरी त्रस्त झाले आहेत. वन्यप्राण्यांना हकण्यासाठी शेतात गेलेल्या शेतकऱ्यावर हे वन्य प्राणी हल्ले करत आहेत. त्यामुळे जिल्ह्यात अनेक शेतकरी गंभीर जखमी झाले आहेत. अनेकदा वनविभागाकडे तक्रारी केल्या. मात्र, काहीच दखल घेतली गेली नाही. आधीच निसर्गाच्या लहरीपणामुळे त्रस्त असलेला शेतकरी वन्यप्राण्यांच्या त्रासाने हैराण झाला आहे. त्यातच टेकडी भागातील आणि माळ राणाकडची शेती प्राण्यानी फस्त केलेली आहे. उभे पिक फस्त झाल्याने शेतकऱ्यांवर उपासमारीची वेळ येऊन ठेपली आहे. प्राण्यांचा बंदोबस्त करण्याच्या मागणीसाठी रिपब्लिकन सेनेचे जिल्हाप्रमुख किरण घोंगडे यांनी काढलेल्या गोफण मोर्चात मोठ्या संख्येने शेतकरी सहभागी झाले होते.

या आहेत मागण्या -

रोही, रानडुक्कर यासह, हरीण आदी प्राणी शेतीचे नुकसान करत असल्याने, त्या वन्यप्राण्यांचा तात्काळ बंदोबस्त करावा. या प्राण्यांपासून झालेल्या पिकाची नुसकान भरपाई म्हणून शेतकऱ्यांना 100 टक्के मदत करावी. शेतकऱ्यांच्या पिकाचे संरक्षण करण्यासाठी वन विभागाने तात्काळ तार कुंपण करून द्यावे, दलित, आदिवासी, बंजारा व इतर समाजातील शेतकऱ्यांच्या शेतजमिनी वृक्षलागवडीच्या नावाखाली वन विभागाने ताब्यात घेणे थांबवावे. वन्य प्राण्या पासून शेतकऱ्यावर होणारे हल्ले रोखण्यासाठी शेतकऱ्यांना शस्त्र वापरण्याची परवानगी द्यावी, यासह विविध मागण्यांचे निवेदन वनपरिक्षेत्र अधिकारी माधव केंद्रे यांना देन्यात आले.