हिंगोलीत राष्ट्रवादी तालुकाध्यक्षाची पक्षाला सोडचिठ्ठी, वंचितमध्ये प्रवेश

राष्ट्रवादी काँग्रेसचे तालुकाध्याक्ष माधव कोरडे यांनी वंचितचे वारे पाहून थेट राष्ट्रवादीला सोडचिठ्ठी देत वंचितमध्ये प्रवेश केला आहे. कोरडेच नव्हे तर वंचितकडून निवडणूक लढविण्यासाठी अनेक तगडे उमेदवार रिंगणात आहेत. त्यामुळे नेमका कोणता उमेदवार हिंगोली विधानसभा मतदार संघासाठी पक्षप्रमुख प्रकाश आंबेडकर देतात याकडे सर्वांचे लक्ष लागून आहे.

हिंगोली- विधानसभा निवडणुकीची आचारसंहिता अवघ्या काही दिवसांत जाहीर होणार आहे. मात्र, विधानसभेच्या तोंडावर विविध पक्षांतून आउट गोईंग अन इन्कमिंग जोरदार सुरु आहे. राष्ट्रवादीच्या तालुकाध्यक्षांनी राष्ट्रवादीला सोडचिठ्ठी देत वंचितमध्ये प्रवेश करून तिकीटाची देखील मागणी केली आहे. त्यामुळे हिंगोलीतील राजकीय वर्तुळात एकच चर्चा रंगत आहे.

हिंगोली लोकसभा मतदार संघात वंचितला मतदारांनी भरभरून प्रतिसाद दिल्याने, राष्ट्रवादी-काँग्रेस सरकारमध्ये सत्तेत असलेले अनेक नेते व कार्यकर्ते वंचितच्या वाटेवर आहेत. ही परिस्थिती केवळ हिंगोली मतदार संघाचीच नव्हे तर संपूर्ण महाराष्ट्रातच दिसत आहे. त्यामुळे वंचितकडून निवडणूक लढविण्यासाठी अनेक दिग्गज गुडघ्याला बाशिंग बांधून तयार आहेत. तर आपणच निवडून येणार याचा दावा मुलाखतीतून करत आहेत. राष्ट्रवादीचे हिंगोली तालुकाध्यक्ष माधव कोरडे यांनी वंचितचे वारे पाहून थेट राष्ट्रवादीला सोडचिठ्ठी देत वंचितमध्ये प्रवेश केला आहे.

हेही वाचा-वसमत मतदारसंघात तिहेरी लढत; जयप्रकाश मुंदडांची प्रतिष्ठा पणाला

मी अतिशय तळागळाचा कार्यकर्ता असून, गोर गरिबांची मला जाण आहे. तर मुख्य म्हणजे घरकुलाच्या बाबतीतील मजुरांच्या बुडीत मजुरीचा प्रश्न राष्ट्रवादीमध्ये असताना सोडवला असल्याचे कोरडे यांनी सांगितले. त्यामुळे जनता हे विसरणार नाही. उमेदवारी मिळाल्यास नक्कीच सोने होईल आणि विजयाची माळ हमखास पडेल असे 'ईटीव्ही भारत'शी बोलताना माधव कोरडे यांनी सांगितले. कोरडेच नव्हे तर वंचितकडून निवडणूक लढविण्यासाठी अनेक तगडे उमेदवार रिंगणात आहेत. त्यामुळे नेमका कोणता उमेदवार हिंगोली विधानसभा मतदार संघासाठी पक्षप्रमुख प्रकाश आंबेडकर देतात याकडे सर्वांचे लक्ष लागून आहे.