संत नामदेवांच्या जन्मस्थळी परतवारी दर्शनासाठी होणार भाविकांची मांदियाळी; सोहळ्याची तयारी अंतिम टप्प्यात

संत नामदेव यांचे जन्मस्थान असलेल्या नरसी नामदेव येथे परतवारी सोहळ्याची तयारी अंतिम टप्प्यात आहे. आषाढी वारी नंतर येणाऱ्या एकादशीला विठोबा संत नामदेवांच्या भेटीला येतात, अशी अख्यायिका आहे. ही वारकरी परंपरा परतवारी सोहळ्याच्या निमित्ताने जपली जाते. पंढरपूर येथे दर्शनासाठी गेलेले वारकरी संत नामदेवांच्या दर्शनासाठी येथे आवर्जून हजेरी लावतात.

हिंगोली - हिंगोली जिल्ह्यातील संत नामदेव यांचे जन्मस्थान असलेल्या नरसी नामदेव येथे परतवारी सोहळ्याची तयारी पूर्णत्वास गेली आहे. श्री संत नामदेव महाराज यांच्या दर्शनासाठी महाराष्ट्राच्या कानाकोपऱ्यातून वारकरी व नामदेव भक्त दरवर्षी लाखोंच्या संख्येने नरसीमध्ये दाखल होत असतात.

परिसरातील वारकरी संप्रदाय देखील येथे मोठ्या संख्येने हजेरी लावत असतो. आषाढी वारी नंतर येणाऱ्या एकादशीला विठोबा संत नामदेवांच्या भेटीला येतात, अशी अख्यायिका आहे. ही वारकरी परंपरा परतवारी सोहळ्याच्या निमित्ताने जपली जाते. भाविकांना शांततेत दर्शन घेता यावे व कुठलाही अनुचित प्रकार घडू नये, यासाठी मोठ्या प्रमाणावर पोलीस बंदोबस्त करण्यात आला आहे.स्वच्छतागृहे, बॅरिकेट्स, वाहनतळाची उभारणी अंतिम टप्यात आली आहे. यावर्षी दर्शनासाठी येणाऱ्या भाविकांना 35 क्विंटल साबुदाणा खिचडीचे वाटप केले जाणार आहे. स्थानिक उद्योजक व व्यापारी दर्शनासाठी आलेल्या भाविकांना महाप्रसादाचे व लाडूचे वाटप करणार आहेत. तीन दिवसांपासून पाऊस सुरू आहे. दर्शनासाठी येणाऱ्या भाविकांची गैरसोय होणार नाही, यासाठी दर्शन रांगेवर टिनपत्रे टाकण्यात आली आहेत. सध्या नामदेवांच्या मंदिराचा जीर्णोद्धार सुरू आहे. त्यामुळे संस्थांनच्या वतीने स्वयंसेवकांची संख्या मोठ्या प्रमाणात वाढवण्यात आली आहे. पंढरपूर येथे दर्शनासाठी गेलेले वारकरी संत नामदेवांच्या दर्शनासाठी येथे आवर्जून हजेरी लावतात.