हिंगोली- जिल्ह्यात वन्य प्राण्यांचा त्रास मोठ्या प्रमाणात वाढला आहे. एका कळपामध्ये 150 ते 200 नीलगाय (रोहींची) संख्या असल्याने शेती पिकांचे मोठे नुकसान होत आहे. या वन्यप्राण्यांचा बंदोबस्त करण्याच्या मागणीसाठी प्रहार जनशक्ती पक्षाच्या वतीने औंढा नागनाथ तालुक्यातील धार फाटा येथे रास्ता रोको करण्यात आला.
या रास्ता रोको मध्ये परिसरातील धार, गोजेगाव, साळणा, चिमेगाव, रुपुर, पारडी, सावळी, केळी, माथा आदी गावातील शेतकरी मोठ्या संख्येने सहभागी झाले होते. तर, यावेळी पोलीस प्रशासनाच्या वतीने चोख पोलीस बंदोबस्त ठेवण्यात आला होता.
यावेळी तालुका वनाधिकारी केंद्रे यांनी मागण्या मान्य करण्याचे लेखी आश्वासन दिले. रास्ता रोकोमुळे लांबलचक वाहनांच्या रांगा लागल्या होत्या. त्यामुळे काही काळ या मार्गावरून ये-जा करणाऱ्या वाहन चालकांना त्रास सहन करावा लागला. वन विभागाने लेखी आश्वासन तर दिले. मात्र, आता ते कितपत पाळले जाणार याकडे सर्वांचे लक्ष लागले आहे.