हिंगोली - अवैध नळजोडणी घेऊन त्यावर चालवण्यात येणारा बाटली बंद पाणी निर्मितीचा उद्योग नगरपालिकेने बंद पाडला. शहरातील हनुमान नगर भागात हा कारखाना सुरू असल्याची गोपनीय माहिती नगरपालिकेच्या पथकाला मिळाली होती. या कारवाईत लाखो रुपयांचे प्लास्टिक जप्त करण्यात आले आहे. नगरपालिकेने तोतया ग्राहक पाठवून या कारखान्याची शहानिशा केली होती.
नगरपालिकेने बंद पाडला पाण्याचा कारखाना
संपूर्ण महाराष्ट्रात सिंगल युज प्लास्टिकवर पूर्णपणे बंदी घालण्यात आली आहे. त्या अनुषंगाने हिंगोली नगरपालिकेच्यावतीने शहरात प्लास्टिक बंदी मोहीम राबवली जात आहे. शहरातील हनुमाननगर भागात 'गुरू प्रसाद वॉटर प्लॅन्ट' हा बाटली बंद पाण्याचा कारखाना सुरू असल्याची गोपनीय माहिती हिंगोली नगरपालिकेचे मुख्याधिकारी रामदास पाटील यांना मिळाली. त्यानंतर पाटील यांनी याठिकाणी एक तोतया ग्राहक पाठवून याबाबत शहानिशा केली.