हिंगोली -कोरोनाच्या पार्श्वभूमीवर करण्यात आलेल्या लॉकडाऊननंतर 14 मे पासून दारू विक्रीला परवानगी देण्यात आली आहे. वाईन शॉपसमोर मद्यप्रेमींची दारू घेण्यासाठी लांबलचक रांग लागत आहे, अशाच परिस्थितीत चक्क महिलाही दारू घेण्याच्या रांगेत उभे राहिल्याचे पाहून सर्वच जण आवाक झाले. त्यांना कोणी विचारण्याचे धाडस केले नाही, मात्र पोलिसांना मिळालेल्या उत्तराने सर्वच जण चक्रावून गेले. महिला म्हणतात, की पुरुषच दारू पिणार का, आम्हाला नको, मग आम्हाला ही परवाना द्या.
हिंगोलीत दारू खरेदीसाठी महिलांच्याही लांबच लांब रांगा हिंगोली जिल्ह्यात जिल्हाधिकारी रुचेश जयवंशी यांनी दारू विक्रीला परवानगी दिल्यानंतर मद्यप्रेमींकडून दारू विक्रीच्या दुकानासमोर लांबलचक रांगा लागल्याचे दिसून आले. आपल्याला मिळेल की नाही या भीतीपोटी तळीराम एकच गोंधळ करीत आहेत, त्यामुळे शासनाने ठरवून दिलेल्या वेळेआधी दुकान बंद करण्याची वेळ दारू विक्रेत्यांवर येऊन ठेपली होती. मात्र वसमत येथे तर चक्क पुरुषाच्या खांद्याला खांदा लावून महिलाही दारू खरेदी करण्यासाठी रांगेत थांबल्या होत्या. महिला रांगेत थांबल्याचे पाहून सर्वच जण चक्रावून गेले होते. जसजसे पुरुष रांगेत पुढे सरकत होते त्याचप्रमाणे महिलाही पुढे- पुढे सरकत होत्या. मात्र महिला रांगेत उभ्या राहून कोणासाठी दारू खरेदी करत होत्या, हे कळतच नव्हते आणि त्यांना विचारण्याचे धाडस कोणी करत नव्हते.
परंतु सर्वच जण चांगलेच चक्राऊन गेले होते, शेवटी बंदोबस्तासाठी तैनात एका पोलीस कर्मचाऱ्याने त्या महिलांना विचारण्याचा प्रयत्न केला. तर महिलांनी दिलेल्या उत्तराने सर्वजण चक्रावून गेले. महिला म्हणतात की, पुरुष मंडळी दारू पिऊ शकतात, तर मग आम्ही का नाही. आम्हालाही दारू पिण्यास परवानगी द्यावी. जो पर्यंत दारू विक्री असेल तोपर्यंत आम्ही दारूच्या रांगेत थांबून दारू खरेदी करण्यासाठी थांबणारच. शासनाने आम्हालाही आता दारू पिण्याचा परवाना द्यावा, अशी विनंती या महिला करीत होत्या. जोपर्यंत दारूविक्री सुरू होती, तोपर्यंत या महिला उभ्या होत्या.
एवढेच नव्हे तर सध्याच्या विदारक परिस्थिती मध्ये घरात काहीही नसताना देखील आमचे पतिराज दारू खरेदी करण्यासाठी जिवाचे रान करीत आहेत. पोलीस या महिलांना बाहेर काढण्यासाठी विनंती करत होते मात्र; महिला अजिबात त्यांचे ऐकण्याच्या मनस्थितीत नव्हत्या. दुपारी एक वाजेपर्यंत दुकान बंद होईपर्यंत त्या महिला रांगेमध्ये उभ्या होत्या. मात्र शेवटपर्यंत कोणासाठी दारू खरेदी करत होत्या, हे कळू शकले नाही.
