हिंगोली - शहरातील नवीन मोंढा परिसरात असलेल्या साक्षी गिफ्ट सेंटरला शॉटसर्किटमुळे आग लागल्याची घटना घडली. यात दुकानातील साहित्य जळून खाक झाले. वेळीच अग्निशमन दल घटनास्थळी दाखल झाल्याने, आग आटोक्यात आली. त्यामुळे आजूबाजूच्या दुकानाची हानी टाळली. मात्र, आगीत दुकानातील दीड ते दोन लाखापर्यंत नुकसान झाले आहे.
हिंगोली शहरातील जवाहर रोड वर तळमजल्यात असलेल्या, साक्षी गिफ्टच्या दुकानातुन धूर येत असल्याचे आजूबाजूला असलेल्या दुकानदारांच्या लक्षात आले. त्यामुळे दुकानदारांनी जवळ जाऊन दुकानाची पाहणी केली असता दुकानातून धुराचा भडका येत होता. यानंतर दुकान मालकाला या संबंधीत माहिती देण्यात आली. दुकान मालकाने घटनास्थळी धाव घेतली. यावेळी त्यांनी शटर उघडून पहिले असता दुकानातील सर्वच वस्तूंनी पेट घेतल्याचे दिसून आले.
घटनेची माहिती अग्निशमन दलाला कळताच घटनास्थळी धाव घेतली अन आग आटोक्यात आणण्यासाठी प्रयत्न केले. गिफ्ट सेंटर मध्ये अतिशय नाजूक आणि बारीक असलेल्या वस्तू पूर्णत: जळून खाक झाल्या. मात्र, वेळीच आग आटोक्यात आल्याने, आजूबाजूला असलेल्या दुकानाची हानी टळली. अजून तरी घटनेचा पंचनामा झालेला नाही. मात्र, दोन लाखांच्या जवळपास नुकसान झाल्याचा अंदाज दुकान मालकाने वर्तवला आहे.