हिंगोली- जिल्ह्यात सलग दोन दिवस झालेल्या पावसामुळे शेती पिकांचे प्रचंड नुकसान झाले आहे. तर, मुसळधार पावसामुळे वसई येथील पूल वाहून गेला आहे. त्यामुळे सात गावांचा संपर्क तुटला आहे. शिवाय, या भागांतील अनेक शेतशिवारात मोठ्या प्रमाणात पाणी साचले आहे. परिणामी, शेतकऱ्यांवर तिबार पेरणी करण्याची वेळ येऊन ठेपली आहे. यामुळे शेतकऱ्यांचा आर्थिक भुर्दंड वाढणार आहे.
हिंगोली जिल्ह्यात सलग दोन दिवस मुसळधार पावसाने हजेरी लावली आहे. त्यामुळे नदी नाले दुथडी भरून वाहू लागले. तसेच दुबार पेरणी केलेल्या क्षेत्रात शिवारांमध्ये देखील मोठ्या प्रमाणात पाणी साचल्याने अनेक शेती खरडून गेली आहे. जिल्ह्यातील अनेक मंडळांमध्ये अतिवृष्टी झाली आहे; औंढा नागनाथ तालुक्यातील येळेगाव मंडळात तर शंभर मिलिमीटर पावसाची नोंद झाली. तसेच सेनगाव तालुक्यातील गोरेगाव मंडळात 80 मिलिमीटर, आजेगावमध्ये 67 मिलिमीटर पाऊस झाला आहे. परिणामी, नदीकाठच्या शेतशिवारात काहीच पिक राहिले नाही, त्यामुळे तेथील शेतकऱ्यावर तिसऱ्यांदा पेरण्याची वेळ आली आहे.