हिंगोली- केंद्रसरकारने 10 हजार टन दूध पावडर आयात करण्याचा निर्णय घेतल्यामुळे शेतकरी संघटना आक्रमक झाल्या आहेत. राज्यभरात ठिकठिकाणी आंदोलन करण्यात येत आहे. हिंगोलीत आज स्वाभिमानी शेतकरी संघटनेच्या वतीने हिंगोलीकडे दूध घेऊन जाणारा ट्रक पेटवून देण्याचा प्रयत्न केला आहे. त्यामुळे वाहन चालकांमध्ये काही काळ भीतीचे वातावरण निर्माण झाले होते.
त्यामुळे सरकारने हा निर्णय रद्द करावा, 30 हजार दूध पावडरचा बफर स्टॉक करावे, निर्यात अनुदान प्रति किलो 30 रुपये देण्यात यावे, दूध, पावडर, बटर इतर दुग्धजन्य पदार्थाची जीएसटी पूर्णपणे रद्द करावी. तसचे पुढील तीन महिन्यासाठी राज्य सरकारने थेट शेतकऱ्यांच्या खात्यावर प्रति लिटर 5 रुपये अनुदान जमा करावे, अशा विविध मागण्यासाठी स्वाभिमानी शेतकरी संघटनेच्या वतीने हिंगोली जिल्ह्यात आंदोलन करण्यात आले.
यावेळी हिंगोलीकडे दूध घेऊन जाणाऱ्या ट्रकला पेटवून देण्याचा प्रयत्न केला गेला. अचानक ट्रक पेटवून देण्याचा प्रयत्न केल्यामुळे रस्त्यावरुन ये-जा करणाऱ्या वाहनधारकांमध्ये भीतीचे वातावरण निर्माण झाले होते. मात्र सुदैवाने कोणताही अनुचित प्रकार घडलेला नाही. या प्रकरणी अजून तरी कोणतीही नोंद झालेली नाही. मात्र ट्रक पेटवून देण्यासाठी देताना आंदोलक चांगलीच खबरदारी घेत होते.