गोंदिया- महाराष्ट्र-छत्तीसगड राज्याच्या सीमेवरील बोरतलाव जंगल परिसरात सुरक्षा बल व नक्षलवाद्यांमध्ये चकमक झाली. या चकमकीत ७ नक्षलवादी ठार झाले आहेत. यामध्ये ३ महिलांचा समावेश आहे. ही घटना आज (शनिवार) सकाळी छत्तीसगड राज्यातील राजनांदगाव जिल्ह्यातील बोरतलाव, शेरपार व सीतागोटा डोंगराळ परिसरात घडली. घटना स्थळावरुन मोठ्या प्रमाणात शस्त्रसाठा जप्त करण्यात आला आहे.
गोंदिया जिल्ह्यातील सालेकसा तालुक्यापासून १५ किलोमीटर अंतरावर चकमक घडलेले ठिकाण आहे. कारवाई दरम्यान ७ नक्षलवाद्यांना ठार करण्यात आले. नक्षलवाद्यांकडून एके - ४७ बंदुका, १२ बोअरच्या बंदुका तसेच इतर शस्त्रात्रे जप्त करण्यात आले. तसेच या चकमकीत सुरक्षा दलाचे ३ जवान जखमी झाल्याची माहिती मिळाली आहे.
हल्ला घडवल्यानंतर गोंदिया जिल्ह्यात नक्षलवादी सुरक्षित स्थळी येतात. त्यामुळे गोंदियाला नक्षलवाद्यांचे 'रेस्ट झोन' म्हणूनही ओळखले जाते. 'गोंदिया पीपल्स लिबरेशन गुरिल्ला आर्मी' व जनवादी क्रांतीकारी माओवादी संघटनेच्यावतीने २८ जुलै ते ३ ऑगस्टपर्यंत शहीद नक्षल सप्ताह पाळला जातो. या सप्ताहा दरम्यान नक्षलवाद्यांकडून मोठ्या घातपाताच्या घटना घडविल्या जातात. त्यामुळे सुरक्षा दलांकडून परिसरात कडेकोट बंदोबस्त ठेवला जातो.