गोंदियात नाल्यामध्ये प्रेमीयुगुलाची आत्महत्या? कुजलेल्या अवस्थेत सापडले मृतदेह

कनेरी नाल्याजवळ दुर्गंध येत असल्याची कुजबुज गावात सुरू होती. त्यानंतर गावकऱ्यांनी  शोध घेतला असता नाल्याजवळील झुडपात युवक युवतीचे प्रेत कुजलेल्या अवस्थेत आढळून आले

गोंदिया - जिल्ह्याच्या सडक अर्जुनी तालुक्यातील कनेरी नाल्यामध्ये प्रेमीयुगलाचे मृतदेह कुजलेल्या अवस्थेत आढळून आले आहेत. या दोघांनीही आत्महत्या केल्याची प्राथमिक माहिती असून या घटनेमुळे परिसरात एकच खळबळ उडाली आहे. मृतांमध्ये संदीप यशवंत कावळे (वय 23 वर्षे) व संगीता बोहरे (वय 16 वर्ष, रा. कनेरी) यांचा समावेश आहे. हे दोघेही काही दिवसांपासुन घरातून पसार झाल्याचे समोर आले आहे.

कनेरी नाल्याजवळ दुर्गंध येत असल्याची कुजबुज गावात सुरू होती. त्यानंतर गावकऱ्यांनी शोध घेतला असता नाल्याजवळील झुडपात युवक युवतीचे प्रेत कुजलेल्या अवस्थेत आढळून आले. गावकऱ्यांनी याची माहिती डुगीपार पोलिसांना दिली. त्यानंतर पोलिसांनी घटना स्थळी दाखल होत तपास सुरू केला असता दोन्ही मृतांची ओळख पटली.

हेही वाचा- दुबईत गोंदियातील २५ तरुण अडकले; स्वतःच्या सुटकेसाठी तयार केला व्हिडिओ

दोघांचे प्रेम संबंध असल्याने घरच्यांचा त्यांना विरोध होता. त्यामुळे या दोघांनी आत्महत्या केली असल्याची प्राथमिक माहिती समोर येत आहे. प्रेत कुजलेल्या स्थितीत असल्याने दोघांचे घटनास्थळीच नातेवाईकांच्या समक्ष शवविच्छेदन करण्यात आले. घटनेची नोंद डुग्गीपार पोलीस ठाण्यात करण्यात आली आहे. पुढील तपास सुरू आहे.

हेही वाचा- गोंदियातील अदानी विद्युत प्रकल्पासमोर कर्मचाऱ्यांचे सहकुटुंब आंदोलन