कोरोनामुक्त गोंदियात कोरोनाचा पुन्हा शिरकाव; एकाच दिवशी तबब्ल १४ नव्या रुग्णांची नोंद

गोंदिया जिल्ह्यातील सर्व कोरोनाबाधित रूग्ण १० जुनपर्यंत कोरोनामुक्त झाले होते. त्यानंतर आजपर्यंत जिल्ह्यात नवीन कोरोनाबाधितांची नोंद झाली नव्हती. त्यामुळे गोंदिया जिल्हा हा कोरोनामुक्त झाला होता.

गोंदिया -दुबईहुन गोंदियातील तिरोडा तालुक्यात एकत्रित परतलेल्या काही नागरिकांचे स्वॅब (घशातील स्त्रावाचे) नमुने घेण्यात आले होते. त्यापैकी १२ जुन ते १४ जुनपर्यंत प्रत्येकी एक-एक असे तीन दिवसात ३ कोरोना रुग्ण जिल्ह्यात आढळून आले होते. मात्र, आज (सोमवार) १५ जून रोजी तबब्ल १४ लोकांचे कोरोना चाचणी अहवाल पॉझिटिव्ह आल्याने जिल्ह्यात पुन्हा एकदा कोरोनाने शिरकाव केल्याचे समोर आले आहे.

गोंदियात दुबईहुन परतलेल्या काही नागरिकांना कोरोना झाल्याचे निष्पन्न झाल्याने जिल्ह्यातील अ‍ॅक्टिव्ह कोरोनाबाधित रूग्णांचा आकडा आता १७ वर पोहोचला आहे. तर, आतापर्यंतच्या एकूण बाधितांची संख्या ८६ वर पोहोचली आहे. जिल्ह्यात १० जुनपर्यंत नव्या कोरोनाबाधित रूग्णांची नोंद झालेली नव्हती. तसेच कोविड केअर सेंटरमध्ये उपचार घेत असलेले सर्वच रुग्ण कोरोनामुक्त झाले होते.

हेही वाचा...आली लहर केला कहर.. भूक लागली म्हणून बंदुकीचा धाक दाखवत तीन भामट्यांनी केली १० लिटर दुधाची लूट

दुबईहुन तिरोडा तालुक्यात परतलेल्या एकूण १७ नागरिकांना कोरोना झाल्याचे निष्पन्न झाले असून त्यांच्यावर गोंदिया जिल्हा क्रिडा संकुलातील कोविड केअर सेंटरमध्ये उपचार सुरू आहेत.

गोंदिया जिल्ह्यात कोरोनाबाधित रूग्ण बरे होण्याचे प्रमाण चांगले आहे. ही बाब जिल्हावासियांसाठी दिलासादायक आहे. परंतु, सोमवारपर्यंत आढळलेल्या नव्या १७ कोरोना रुग्णांमुळे जिल्ह्यातील नागरिकांच्या चिंतेत भर पडली आहे.