दाम दुप्पट योजना! नागरिकांना लुबाडणाऱ्या भामट्यांना अटक

पैसे दुप्पट करून देण्याच्या नावाखाली ठेवीदारांचे पैसे लुबाडणाऱ्या सनशाईन कंपनीच्या दोन संचालकांना, गडचिरोली स्थानिक गुन्हे शाखेकडून अटक करण्यात आली आहे.

गडचिरोली - दाम दुप्पट करून देण्याच्या नावाखाली नागरिकांना लुबाडणाऱ्या सनशाईन कंपनीच्या दोन संचालकांना गडचिरोली स्थानिक गुन्हे शाखेच्या पोलिसांनी सोमवारी अटक केली. रमेशचंद्र गणपतसिंह नायक (रा.छायन, झाबुआ-मध्यप्रदेश) व किसनलाल बसराम मेरावत (रा. राठधनराज,बासवारा-राजस्थान) अशी अटक केलेल्या आरोपींची नावे आहेत. न्यायालयाने त्यांना ७ फेब्रुवारीपर्यंत पोलीस कोठडी सुनावली आहे.

हेही वाचा... फोन टॅपिंग प्रकरण: दोन सदस्यीय समिती करणार चौकशी - गृहमंत्री

काय आहे प्रकरण ?

रमेश्चंद्र नायक व अन्य सात जणांनी सनशाईन हायटेक इन्फ्राकॉम नामक कंपनी स्थापन केली. त्यांनी या कंपनीच्या शाखा ठिकठिकाणी उघडल्या. गडचिरोलीतही या कंपनीची शाखा होती. कंपनीने कमी कालावधीत जास्त रकमेचे आमिष दाखवून अभिकर्त्यांमार्फत ठेवीदारांना गुंतवणूक करण्यास प्रोत्साहित केले. गडचिरोली शाखेत ५१ अभिकर्त्यांमार्फत २,१३७ नागरिकांनी २ कोटी २९ लाख ३ हजार ४९० रुपये गुंतवले. परंतु ऑक्टोबर २०१५ मध्ये कंपनीने अचानक गडचिरोली येथील कार्यालय बंद केले. पुढे बऱ्याच कालावधीनंतर ठेवीदारांनी तक्रार केल्याने गडचिरोली पोलीस ठाण्यात गुन्हा दाखल करण्यात आला.

हेही वाचा... नरवीर 'तान्हाजी मालुसरे' यांच्य‍ा कोंढाणा रणसंग्राम‍ाची ३५० वर्षपुर्ती

या प्रकरणाची व्याप्ती व गांभीर्य लक्षात घेऊन पोलीस अधीक्षक शैलेश बलकवडे यांनी हे प्रकरण स्थानिक गुन्हे शाखेकडे वर्ग केले. त्यानंतर स्थानिक गुन्हे शाखेने तपास सुरु करुन दोन संचालकांना अटक केली. गडचिरोलीत साईप्रकाश, सुविधा फॉर्मिंग, मैत्रेय, आरोग्य धनवर्षा या कंपन्यांनीही अशीच कार्यालये उघडून नागरिकांची फसवणूक केली असल्याचे समोर येत आहे. यातील काही जणांना अटकही करण्यात आली आहे.

अशा कंपन्यांमध्ये आपली फसवणूक झाल्याचे लक्षात आले असेल तर ठेवीदारांनी आपल्या पॉलिसी बाँडसह स्थानिक गुन्हे शाखा, पोलीस अधीक्षक कार्यालय गडचिरोली येथे संपर्क साधावा, असे आवाहन पोलीस निरीक्षक उल्हास भुसारी यांनी केले आहे.

हेही वाचा... काँग्रेस नेत्याने स्वतःच्या मुलावरच झाडली गोळी, संपत्तीच्या वादातून घडला प्रकार