गडचिरोली - उन्हाळ्यात कोरड्या पडत चाललेल्या बोरी गावालगतच्या प्राणहिता नदीच्या परिसरात दारू गाळली जात होती. याची माहिती मिळताच महिलांनी या परिसरात धडक कारवाई करताना तब्बल १०० ड्रम सडवा नष्ट केला. सोबतच दारू गाळण्यासाठी वापरण्यात येणारे साहित्य आणि ड्रमही जाळून नष्ट केले. राजपूरपॅच येथील मुक्तिपथ गाव संघटनेच्या महिलांनी ही कारवाई केली.
सडवा नष्ट करताना महिला आणि युवक
अहेरीपासून २० किमी अंतरावरील बोरी गावाला लागून असलेल्या प्राणहिता नदीवर गावठी दारू गाळण्याच्या प्रकार मोठ्या प्रमाणात चालतो. उन्हाळ्यामुळे नदी कोरडी पडत असल्याने नदीच्या मधोमध असलेल्या झाडीझुडपांमध्ये सडवा लपून ठेवला जातो. राजपूरपॅच आणि बोरी या दोन्ही गावातील लोक दारू गाळण्याचे काम करतात. ४ दिवसांपूर्वी राजपूरपॅच येथील महिलांनी तिना नदी परिसरात असलेला गुळसडवा नष्ट केला होता.