नितीन गडकरींचे गडचिरोली जिल्हावासियांना पुन्हा 'नागपूर मेट्रो'चे गाजर

जिल्ह्यातील देसाईगंज-गडचिरोली या रेल्वे मार्गाचा प्रश्न गेल्या अनेक वर्षांपासून रेंगाळलेला असताना केंद्रीय मंत्री तथा भाजपचे स्टार प्रचारक नितीन गडकरी यांनी पुन्हा एकदा गडचिरोली जिल्हावासियांना 'नागपूर मेट्रो'चे गाजर दाखविले आहे.

गडचिरोली- जिल्ह्यातील देसाईगंज-गडचिरोली या रेल्वे मार्गाचा प्रश्न गेल्या अनेक वर्षांपासून रेंगाळलेला असताना केंद्रीय मंत्री तथा भाजपचे स्टार प्रचारक नितीन गडकरी यांनी पुन्हा एकदा गडचिरोली जिल्हावासियांना 'नागपूर मेट्रो'चे गाजर दाखविले आहे. ते गडचिरोली-चिमूर क्षेत्राचे महायुतीचे उमेदवार अशोक नेते यांच्या प्रचारार्थ चामोर्शी येथे सोमवारी आयोजित प्रचारसभेत बोलत होते.

नितीन गडकरी म्हणाले, गडचिरोली जिल्ह्यातील देसाईगंज-गडचिरोली हा रेल्वेमार्ग रखडलेला असला तरी लवकरच या मार्गाचे काम पूर्ण होणार आहे. हा रेल्वेमार्ग गडचिरोलीवरून आदिलाबाद ते मंचेरियलला जोडला जाईल. हा मार्ग पूर्ण झाल्यानंतर नागपूरमध्ये सुरू झालेली मेट्रो ट्रेन नागभिड मार्गे गडचिरोली पर्यंत आणू. आदिलाबाद-मंचेरीअल रेल्वे मार्गासाठी सर्व्हेक्षण सुरु झाल्याचेही ते म्हणाले.

गडचिरोली हा जंगलाचा जिल्हा आहे. श्रीमंती असूनही जिल्ह्यातील नागरिक गरीब आहेत. वनकायद्यामुळे जिल्ह्यात उद्योग नाहीत. ही अडचण दूर करण्यासाठी प्रयत्न करणार. अनेक नद्यांवर मोठ्या पुलांचे बांधकाम आमच्या सरकारने केले. त्यामुळे वाहतूक व्यवस्था बळकट झाली. बांबूद्वारे जिल्ह्यातील नागरिकांना रोजगार देण्याचा प्रयत्न असून बांबूपासून इथेनॉल-डिझेल तयार करण्याचा प्रयोग सुरू आहे. तसे झाल्यास येथील शेकडो नागरिकांना काम मिळेल व दुसऱ्या देशातून इंधन आयात करण्याची वेळ येणार नाही, असेही ते म्हणाले.

या सभेला विधान परिषद आमदार रामदास आंबटकर, उमेदवार अशोक नेते, पालकमंत्री अमरीश आत्राम, आमदार देवराव होळी, जिल्हा परिषद अध्यक्ष योगिताताई भांडेकर, ज्येष्ठ नेते प्रकाश पोरेड्डीवार, सुरेंद्रसिंह चंदेल, रवी ओल्लालवार आदी उपस्थित होते.