गडचिरोली - नक्षल चळवळीत काम करताना होणारा त्रास आणि पिळवणुकीला कंटाळून एका नक्षल दाम्पत्याने गडचिरोली पोलिसांसमोर आत्मसमर्पण केले. दीपक ऊर्फ मंगरू सुकरू बोगामी (३०) आणि मोती ऊर्फ राधा झुरु मज्जी (२८) अशी त्यांची नावे आहेत.
दीपक हा जून २००१ मध्ये जागरगुंडा (छत्तीसगड) दलममध्ये सदस्य म्हणून भरती झाला होता. जून २०१२ पासून ते आजपर्यंत तो माओवाद्यांच्या कंपनी क्रमांक ५ मध्ये डी.व्ही.सी पदावर कार्यरत होता. त्याच्यावर १७ चकमकीचे, १२ खुनाचे, ०३ भूसुरुंग स्फोट घडवून आणल्याचे गुन्हे दाखल असून महाराष्ट्र शासनाने त्याच्यावर एकुण ९ लाख २५ हजार रुपयांचे बक्षीस जाहीर केले होते.
नक्षलवादी दाम्पत्याचे आत्मसमर्पण राधा मार्च २००४ मध्ये भामरागड (गडचिरोली) दलममध्ये सदस्य म्हणून भरती झाली होती. डिसेंबर २०१७ मध्ये ती उत्तर बस्तर कंपनी क्रमांक १० मध्ये डी.व्ही.सी या पदावर कार्यरत होती. तिच्यावर १५ चकमकीचे आणि २ खुनाचे गुन्हे दाखल आहेत. तिच्यावर महाराष्ट्र शासनाने ९ लाख २० हजार रूपयाचे बक्षीस जाहीर केले होते. या दोघा पती-पत्नीवर ३२ चकमकी, १४ खून, ३ भूसुरुंग स्फोट असे गुन्हे दाखल असल्याने शासनाने त्यांच्यावर १८ लाख ५० हजार रुपयांचे बक्षीस ठेवले होते.
आत्मसमर्पित नक्षलवाद्यांनी दलममधील नक्षलवादी हे अल्पवयीन आदिवासी मुलींना पळवून नेऊन बळजबरीने त्यांना दलममध्ये भरती करत होते, असे कबुल केले. नक्षलवादी नेहमीच स्वत:च्या फायद्यासाठी जाणून बुजून दुर्गम आणि अति दुर्गम भागाच्या विकास कामात आडकाठी निर्माण करतात. या बाबींना कंटाळून आम्ही विकासाच्या मूळ प्रवाहात येण्याचा निर्णय घेतला, अशी माहिती त्यांनी दिली.
राज्य शासनाने आत्मसमर्पण योजना घोषित केल्यानंतर २००५ पासून आजपर्यंत गडचिरोली पोलिसांसमोर ६१२ नक्षलवाद्यांनी आत्मसमर्पण केले आहे, अशी माहिती जिल्हा पोलिस अधीक्षक शैलेश बलकवडे यांनी पत्रकार परिषदेत दिली. यावेळी अप्पर पोलीस अधीक्षक महेंद्र पंडित, अप्पर पोलीस अधीक्षक मोहित कुमार गर्ग उपस्थित होते.
