गडचिरोली जिल्ह्यात मुसळधार पाऊस; गडचिरोली-हैदराबाद राष्ट्रीय महामार्गासह प्रमुख 10 मार्ग बंद

गडचिरोली जिल्ह्यात मुसळधार पाऊस सुरू आहे. जिल्ह्यातील कठाणी, वैनगंगा, दिना, पोटफोडी या नद्या दुथडी भरून वाहत आहेत. त्यामुळे गडचिरोली-हैदराबाद या प्रमुख मार्गासह 10 मार्ग बंद झाले आहेत.

गडचिरोली - जिल्ह्यात गेल्या 24 तासांपासून मुसळधार पाऊस सुरू आहे. जिल्ह्याच्या उत्तर भागातील तालुक्यांमध्ये पूरपरिस्थिती निर्माण झाली आहे. कठाणी, वैनगंगा, दिना, पोटफोडी या नद्या दुथडी भरून वाहत आहेत. त्यामुळे गडचिरोली-हैदराबाद या प्रमुख मार्गासह 10 मार्ग बंद झाले आहेत. यात गडचिरोली-नागपूर या मार्गाचाही समावेश आहे.

धानोरा तालुक्यातील डॉक्टर बंग दांपत्याच्या 'शोधग्राम' प्रकल्पालाही पुराच्या पाण्याने वेढले आहे. या भागात मुसळधार पाऊस पडत असून आसपासच्या गावांतील शेततळी व नाले भरून वाहत आहेत. दरम्यान धानोरा शहराला जोडणाऱ्या मुख्य मार्गावर पाणी आल्याने येथील वाहतूक काही काळ विस्कळीत झाली होती. शोधग्राम प्रकल्पाला पुराचा वेढा कायम असल्याने व्यवस्थापन योग्य ती खबरदारी घेत आहे. याच भागात आदिवासींसाठी असलेले 'माँ दंतेश्वरी' रुग्णालय देखील आहे. या भागावर जिल्हा प्रशासन लक्ष ठेऊन आहे. जिल्हा प्रशासन डॉक्टर बंग यांच्या सतत संपर्कात आहे.