गडचिरोली :गडचिरोली जिल्हा (Gadchiroli District) एकेकाळी संपन्न वन्यजीव समृद्धीने ओळखला जात होता. मात्र गेल्या काही वर्षात इथल्या हिंसक चळवळीमुळे गडचिरोली जिल्ह्यातील जंगलात वन्यजीव लुप्त होत गेले. मात्र आता पुन्हा एकदा जिल्ह्यातील जंगलात वाघ -बिबटे- नीलगायी व अन्य वन्यजीव दर्शन देऊ लागले आहेत. या पार्श्वभूमीवर गडचिरोली शहरापासून (Gadchiroli Cty) दहा किलोमीटर अंतरावर असलेल्या गुरवळा जंगलात (Gurvala Forest) वनविभागाच्या वतीने पहिल्या निसर्ग पर्यटन सफारीची सुरुवात (Nature Tourism Safari) करण्यात आली आहे. गुरवळा येथील राखीव जंगलात चौदा आकर्षक ठिकाणांना जोडून 58 किलोमीटरची ही निसर्ग सफारी पर्यटकांना विविध आकर्षणाची केंद्रे व वन्यजीव दर्शन घडविणार आहे. सफारीची सुरुवात जिल्हा परिषद अध्यक्ष अजय कंकडालवार (ZP President Ajay Kankadalwar) यांच्या हस्ते करण्यात आली. या भागात केवळ जंगलावर गुजराण असलेल्या स्थानिकांना या नव्या प्रयोगामुळे रोजगार मिळेल अशी अपेक्षा वनविभागाने व्यक्त केली आहे.
वनसमृद्ध असलेला हा जिल्हा सोयी नसल्याने आजवर दुर्लक्षित होता. मात्र आता वन्यजीव वैविध्य दिसू लागल्याने अशा पद्धतीच्या निसर्ग पर्यटन सफारी अधिक संख्येत तयार व्हाव्यात यासाठी प्रशासनाच्या वतीने सर्वतोपरी सहाय्य करणार असल्याचे प्रतिपादन जि. प. अध्यक्ष अजय कंकडालवार यांनी केले. या पर्यटन सफारी दरम्यान पर्यटकांना मोर -हरिण- नीलगाय व इतर वन्यजीवांचे दर्शन झाल्याने त्यांनी समाधान व्यक्त केले.