गडचिरोली- नक्षलवाद्यांनी खून केलेल्या निष्पाप बेबी मडावी हिच्या स्मरणार्थ भामरागड तालुक्यातील धोडराज येथील मुख्य चौकात स्मारक बांधण्यात आले आहे. आंतरराष्ट्रीय महिला दिनाचे औचित्य साधत गडचिरोली पोलीस दलातर्फे हे स्मारक बांधण्यात आले आहे. त्या निमित्ताने दिवंगत बेबी मडावीचे वडील गंगा मडावी आणि आई सोनी मडावी यांच्यासह पंचक्रोशीतील सुमारे दीड हजार नागरिकांनी नक्षलवाद्यांविरोधात धोडराज ते इरपणार, अशी 5 किमी रॅली काढून बेबीला श्रद्धांजली वाहिली आहे.
गावातील मुख्य चौकात बेबी मडावी महिला विकास मेळाव्याचे देखील आयोजन करण्यात आले होते. रॅलीवेळी उपस्थितांनी नक्षलवाद्यांना हद्दपार करा आणि विकासाची कास धरा, अशा घोषणा व्यक्त केली. तसेच दुर्गम व अतिदुर्गम भागासह जिल्हाभरातील एकूण 58 ठिकाणी घेण्यात आलेल्या बेबी मडावी महिला विकास मेळाव्यात 9 ते 10 हजार महिलांनी सहभाग घेत प्रचंड प्रतिसाद नोंदविला.