धुळे- शहरातील पांझरा नदीपात्रात अवैधरीत्या वाळूचा उपसा करणाऱ्यांवर कारवाई करण्यासाठी गेलेल्या अप्पर तहसीलदार संजय शिंदे यांच्यावर वाळू उपसा करणाऱ्या कामगारांनी हल्ला करण्याचा प्रयत्न केला. मात्र, पोलिसांनी वेळीच हस्तक्षेप केल्याने पुढील अनर्थ टळला. या घटनेमुळे प्रशासकीय वर्तुळात खळबळ उडाली आहे.
धुळे शहरातील पांझरा नदी पात्रातून मोठ्या प्रमाणावर वाळूचा उपसा केला जातो. अवैधरीत्या चालणारा हा प्रकार रोखण्याचे प्रशासनासमोर आव्हान निर्माण झाले आहे. याबाबत वारंवार कारवाई करून देखील वाळू उपसा करणाऱ्यांवर कुठलाही परिणाम झालेला नाही. गेल्या काही दिवसांपूर्वी शिरपूर तालुक्यात अवैधरित्या वाळू उपसा करणाऱ्यांवर कारवाई करण्यासाठी गेलेल्या प्रशासकीय अधिकाऱ्यांना मारहाण झाल्याची घटना ताजी असताना दुसरीकडे शनिवारी (दि. 4 जाने.) धुळे शहरात या घटनेची पुनरावृत्ती टळली.