धुळ्यात संततधार सुरुच; बुराई प्रकल्पाच्या साठ्यात वाढ

धुळ्यात संततधार सुरू आहे. यामुळे नद्यांच्या साठ्यातही वाढ झाली आहे. बुराई प्रकल्पाच्या साठ्यात वाढला असून शेतकरी आणि नागरिकांंमध्ये आनंदाचं वातावरण आहे.

धुळे- शहरासह जिल्ह्यात आज खूप दिवसांच्या प्रतीक्षेनंतर पावसाने दमदार हजेरी लावली. साक्री तालुक्यातील निजामपूर जैताणेसह माळमाथा परिसरात गेल्या दोन ते तीन दिवसांपासून पावसाची संततधार सुरू आहे. त्यामुळे रोहिणी नदी व वाजदरे येथील बुराई नदी दुथडी भरून वाहत असल्याने बुराई प्रकल्पाच्या साठ्यातही वाढ होत आहे.

आज शहरात दुपारपर्यंत पावसाची रिमझिम सुरू होती. त्यानंतर पावसाने उघडीप दिली आहे. पावसामुळे हवेत गारवा निर्माण झाला आहे. यामुळे गेल्या अनेक दिवसांपासुन उकाड्याने हैराण झालेल्या नागरिकांना दिलासा मिळाला आहे. शहराला पाणीपुरवठा करणार्‍या नकाणे व डेडरगाव तलावात अल्पसाठा होता. या दोन्ही तलावात पावसामुळे पुरेसा साठा झाला आहे. माळमाथा परिसरातही गेल्या चार ते पाच दिवसांपासून संततधार सुरू असून हा पाऊस पिकांना उपयुक्त ठरणार असल्याचे शेतकरी व नागरिक सांगतात.