खोल विहिरीत पडलेल्या म्हशीची क्रेनद्वारे सुटका; धुळे येथील घटना

धुळे येथे शेतात पडलेल्या म्हशीला क्रेनच्या सहाय्याने बाहेर काढण्यात शेतकऱ्यांना यश आले. चाळीस फूट खोल विहिरीत पडल्यानंतरही म्हशीला दुखापत झालेली नाही.

धुळे - जिल्ह्यातील कापडणे येथे शेतात असलेल्या चाळीस फूट खोल विहिरीत म्हैस पडली होती. विहिरीत पडलेल्या म्हशीची सतर्क शेतकऱ्यांनी क्रेनच्या सहाय्याने बाहेर काढून सुटका केली. परिसरातील शेतकऱ्यांच्या सतर्कतेमुळे म्हशीचे प्राण वाचले आहे.

साहेबराव धुडकू माळी यांच्या मालकीची ही म्हैस आहे. गावात उन्हाळ्यापासून चारा टंचाई आहे. मागील आठ दिवसांत बर्‍यापैकी पाऊस झाल्याने गवताची वाढ होत आहे. गवताआड असलेली विहीर लक्षात न आल्याने चारा खात असलेली म्हैस विहिरीत पडल्याचे शेतकऱ्यांनी सांगितले.चाळीस फूट खोल विहिरीत पडल्यानंतरही म्हशीला दुखापत झाली नाही. त्यामुळे साहेबराव माळी यांनी समाधान व्यक्त केले.