नाईट सफारीसाठी महिला गाईड; ताडोबा व्यवस्थापनाचा उपक्रम

ताडोबामध्ये पहिल्यांदाच महिला गाईडला नाईट सफारीवर पाठवण्याचा निर्णय घेण्यात आला. वन विभागाच्या या मोहिमेत ताडोबा प्रकल्पाच्या प्रवेशद्वारावर असलेल्या मोहर्ली गावातील सात महिलांनी मोठ्या उत्साह आणि धाडसाने सहभाग घेतला.

चंद्रपूर - जिल्ह्यातील ताडोबा-अंधारी व्याघ्र प्रकल्पात महिला गाईडला 'नाईट सफारीवर' पर्यटकांना माहिती देण्यासाठी पाठवले जात नसे. मात्र, व्याघ्र प्रकल्प व्यवस्थापनाने 25 डिसेंबरपासून हे क्षेत्र देखील महिलांना खुले केले आहे. पर्यटकांना व्याघ्रदर्शन घडवण्यासाठी सात स्थानिक गाईड्स नाईट सफारीसाठी नेमल्या गेल्या आहेत.

ताडोबामध्ये पहिल्यांदाच महिला गाईडला नाईट सफारीवर पाठवण्याचा निर्णय घेण्यात आला. वन विभागाच्या या मोहिमेत ताडोबा प्रकल्पाच्या प्रवेशद्वारावर असलेल्या मोहर्ली गावातील सात महिलांनी मोठ्या उत्साह आणि धाडसाने सहभाग घेतला. २५ डिसेंबरपासून या महिला गाईड जुनोना गेटवरच्या बफर भागामध्ये पर्यटकांसह जात आहेत.

हेही वाचा - थंडी वाढताच नांदूरमध्यमेश्वर अभयारण्यात भरला पक्ष्यांचा मेळा, पक्षीप्रेमींसाठी पर्वणी

आपली दैनंदिन कामे सांभाळून हे धाडस करताना या महिलांचा आत्मविश्वास दुणावला आहे. ताडोबाच्या परिघातील स्थानिकांना पर्यटन व्यवसायात संधी देण्याचे धोरण प्रकल्प व्यवस्थापनाचे आहे. अगोदर या महिला प्रकल्पात 'बर्ड वॉचर' म्हणून काम करत होत्या. त्यातील काहींची गाईड होण्याची तयारी होती. थोड्या प्रशिक्षणानंतर हे शक्य झाल्याची माहिती अधिकाऱ्यांनी सांगितले. या उपक्रमाचे पर्यटकांनीही कौतुक केले आहे.