चंद्रपूर - 'ज्या एकनाथ खडसेंनी भाजपा पक्षाची पाळेमुळे राज्यात रोवली, ज्यांच्या मार्गदर्शनात आजचे अनेक नेते घडले, त्यांनी भाजपा पक्ष सोडावा, हे अत्यंत वेदनादायक आहे. असा खंदा नेता पक्ष सोडतो, तेव्हा पक्षाचे फार मोठे नुकसान होते. अशाच प्रकारे पक्षाला गळती लागली तर, ही अत्यंत चिंतेची बाब आहे. या घटनेवर पक्षाला आत्मचिंतनाची गरज आहे,' असे म्हणत सुधीर मुनगंटीवार यांनी भाजपालाच सल्ला दिला आहे.
जेव्हा भारतीय जनता पक्षाचे सरकार दूरदूरपर्यंत दिसत नव्हते, तेव्हा महाजन-मुंडे-गडकरी यांच्या खांद्याला खांदा लावत खडसेंनी भाजपा पक्ष तळागाळापर्यंत पोहोचवला. भाजपाच्या विस्तारात खडसेंचे मोठे योगदान आहे. मात्र आज खडसेंनी पक्ष सोडला, ही बातमी एक कार्यकर्ता म्हणून माझ्यासाठी धक्कादायक आहे. एका सच्चा राष्ट्रवादी पक्षातून 'राष्ट्रवादीपणाचा बुरखा' पांघरणाऱ्या पक्षात त्यांची जावे, हे अजूनही न पटण्यासारखे आहे.
हेही वाचा -भाजप सोडणार नाही- रक्षा खडसे, जाणून घ्या या मागे काय असेल कारण...