चंद्रपूर -अवकाशातून पडलेल्या तुकड्यांचा सिंदेवाही तालुक्यात सध्या युद्धपातळीवर शोध घेण्यात येत आहे. यासाठी तलाठी आणि पोलिसांचे पथक तयार करण्यात आले असून त्याचा शोध घेतला जात आहे. जमा करण्यात येणाऱ्या सर्व वस्तू तपासणीसाठी तज्ज्ञांकडे पाठविण्यात येणार असल्याची माहिती तहसीलदार गणेश जगदाळे यांनी दिली. काल (शनिवारी) रात्री अचानक आकाशात उल्कापात होत असल्याचे आढळून आले. मात्र हा कुठला उल्कापात नसून एक उपग्रह सोडताना त्याचे आकाशातून पडलेले तुकडे होते ही बाब समोर आली. यातील एक मोठा तुकडा सिंदेवाही येथील लाडबोरी या गावात पडला. ऐन गावाच्या मधोमध पडला. मात्र सुदैवाने यात कुठलीही जीवितहानी झाली नाही.
प्रतिक्रिया देताना तहसीलदार
आणखी एक गोळा सापडला - त्यानंतर दिनांक ३ एप्रिलला सकाळी पवनपार-टेकरी जंगल परिसरात मोहफूल वेचण्याकरिता गेलेल्या काही नागरिकांना आणखी एक काळ्या रंगाचा गोळा पडलेला दिसून आला. तर दुसरा गोळा मरेगाव येथील रत्नमाला रमेश नैताम ह्या मोहफूल वेचण्याकरिता जंगल परिसरात गेल्या होत्या त्यांना एक मोठा अंदाजे ३ ते ५ किलोचा काळ्या रंगाचा धातूचा गोळा दिसून आला. नैताम यांनी ही माहिती सरपंच देवानंद सहारे यांना दिली. सरपंच व गावकरी नैताम यांना घेऊन त्या ठिकाणी पोहचून त्या गोळ्या ला ग्रामपंचायत कार्यालयात आणले व याची माहीती तालुका प्रशासनाला दिली. मरेगाव येथे मिळालेला गोळा पोलीस स्टेशनला पाठविण्यात आले असल्याची माहिती सरपंच मरेगाव यांनी दिली.