चंद्रपूर - टाळेबंदीने जिल्ह्यातील अर्थव्यवस्थेचे आधीच कंबरडे मोडले. असंघटित क्षेत्रातील कामगारांना याचा सर्वाधिक फटका बसला. हजारोंच्या संख्येने रोजगार बुडाले. टाळेबंदीत शिथिलता दिल्याने ही स्थिती थोडी का असेना पण पूर्वपदावर येत आहे. तर दुसरीकडे कोरोनाची संख्या भयावहरित्या वाढत आहे. अशावेळी यासाठी लोकप्रतिनिधी आणि टाळेबंदीमुळे प्रभावित होणाऱ्या क्षेत्राचे प्रतिनिधी यांच्याशी चर्चा करून काय तो निर्णय घ्यायला हवा. ते न करता सरसकट टाळेबंदी जाहीर करणे हे काही जनतेच्या हिताचे नाही, असे म्हणत खासदार बाळू धानोरकर यांनी पालकमंत्री विजय वडेट्टीवार यांनी केलेल्या टाळेबंदीच्या घोषणेला सुरुंग लावला. या विषयावर त्यांनी जिल्हाधिकारी अजय गुल्हाने यांना सूचना केल्या. पालकमंत्री यांची टाळेबंदीची घोषणा आणि त्यावर खासदारांनी घेतलेला आक्षेप यामुळे जिल्हा प्रशासनासमोर चांगलाच पेच निर्माण झाला आहे.
आधी लोकप्रतिनिधींशी चर्चा, मग काय ते करा; पालकमंत्र्यांच्या टाळेबंदीला खासदारांचा सुरुंग - चंद्रपूर टाळेबंदीला विरोध
सरसकट टाळेबंदी जाहीर करणे हे काही जनतेच्या हिताचे नाही, असे म्हणत खासदार बाळू धानोरकर यांनी पालकमंत्री विजय वडेट्टीवार यांनी केलेल्या टाळेबंदीच्या घोषणेला सुरुंग लावला. या विषयावर त्यांनी जिल्हाधिकारी अजय गुल्हाने यांना सूचना केल्या.
हेही वाचा -केंद्राचे निर्देश येण्यापूर्वीच पालकमंत्र्यांची लॉकडाऊनची घोषणा; जनतेत संभ्रम कायम
यावेळी अनेकांनी अचानक जाहीर केलेल्या टाळेबंदीला विरोध दर्शविला. खासदार धानोरकर यांनी देखील आपली भूमिका मांडली. अजून केंद्र आणि राज्याचे निर्देश न येता अचानक टाळेबंदी जाहीर करणे हे चुकीचे आहे. कोरोनाचा प्रादुर्भाव रोखणे हे अत्यंत गरजेचे आहे, मात्र त्यावर अचानक टाळेबंदी लावणे हा काही योग्य पर्याय नव्हे. जर ती लावायचीही असेल तर आधी सर्व लोकप्रतिनिधी, विविध क्षेत्रातील प्रतिनिधी आणि जिल्हा प्रशासन यांच्यात चर्चा व्हायला हवी. यातून जर टाळेबंदी हाच पर्याय येत असेल तर ती नेमकी कशी असेल यावरही सर्वांची मते जाणून घ्यावी, असे खासदार धानोरकर यांनी स्पष्ट केले. धानोरकर यांनी घेतलेली भूमिका वडेट्टीवार यांच्या घोषणेवर पाणी फेरणारी आहे. यामुळे टाळेबंदीचा खरा पेच जिल्हाधिकारी यांच्यासमोर उभा ठाकला आहे. यावर नेमका कुठला निर्णय घेतला जातो हे बघणे औत्सुक्याचे ठरणार आहे.