चंद्रपूर- कोरोनाची दुसरी लस घेऊनही जिल्ह्यातील तीन डॉक्टरांना कोरोनाची लागण झाल्याने खळबळ उडाली आहे. यामध्ये जिल्हा आरोग्य अधिकारी डॉ. राजकुमार गेहलोत यांच्यासह अन्य दोन डॉक्टरांचा समावेश आहे. या वृत्ताला जिल्हा शल्य चिकित्सक डॉ. निवृत्ती राठोड यांनी दुजोरा दिला आहे.
कोरोनाची पहिली लस घेतल्याच्या 57 दिवसानंतर कोरोनाशी लढण्याची शंभर टक्के रोगप्रतिकारक क्षमता तयार होते. मात्र, याच्यापूर्वी कोरोना झाला तरीही तो इतका धोकादायक नसतो. कारण मानवी शरीरात त्याला प्रतिकार करण्याची क्षमता तयार झालेली असते. पहिली लस घेतल्याच्या 14 दिवसांनी जवळपास 70 टक्के रोगप्रतिकारक्षमता मानवी शरीरात तयार होते. त्यानंतर 28 दिवसानंतर दुसरी लस घेतल्यानंतर पुढील 14 दिवसानंतर शंभर टक्के रोगप्रतिकारक्षमता तयार होते. या तिन्ही डॉक्टरांना लस घेतल्याच्या 57 दिवसांच्या पूर्वी कोरोना झाला. देशभरात अशी अनेक उदाहरणे आहेत. त्यामुळे घाबरून जाण्याचे काहीही कारण असून नागरिकांनी कोरोना लस घ्यावी. ती संपूर्णतः सुरक्षित आहे, असे आवाहन जिल्हा शल्यचिकित्सक डॉक्टर निवृत्ती राठोड यांनी केले आहे.