गावालाच दिले शाळेचे स्वरूप, मुलांचा हसत-खेळत अभ्यास होण्यासाठी उपक्रम

गावातील विद्यार्थी ज्या ठिकाणी एकत्र येऊन खेळतात किंवा बसतात अशा अकरा ठिकाणी दोन विषयाच्या संबंधात माहिती लिहिण्यात आली आहे. ज्यात नकाशा, बाराखडी, पाढे, गणितीय सूत्र आणि आकृत्या रेखाटण्यात आल्या आहेत.

चंद्रपूर- राज्यातील शिक्षण क्षेत्रातील संस्था प्रथम एज्युकेशन फॉउन्डेशनद्वारे शाळेतील विद्यार्थ्यांची गळती रोखण्याकरता लोकसहभागातून 'आमचे गाव' हा प्रकल्प राबविण्यात येत आहे. चिमूर तालुक्यातील खापरी (धर्मु) येथे प्रथम संस्थेंतर्गत शाळेतील विद्यार्थ्यांना रटाळ अभासक्रमाव्यतिरिक्त गावातच हसत खेळत अभ्यास व्हावा यादृष्टीने भिंती रंगवण्यात आल्या. गावात मुले खेळण्याच्या अनेक ठिकाणी या बोलक्या भिंतींनी गावालाच शाळेचे स्वरूप आहे. या भिंतीच फळे बनल्या आहेत.

चिमूर तालुक्यातील तिसगावात प्रथम संस्थेच्यावतीने मागील २ वर्षांपासून या प्रकल्पांतर्गत विविध उपक्रम राबविण्यात येतात. प्रत्येक मूल शाळेत शिकेल व टिकेल हे ब्रीद ध्येय समोर ठेवून हा उपक्रम सुरू केला गेला आहे. गावातील प्रत्येक समुदायाच्या मदतीने संघटितपणे शैक्षणिक विकास व्हावा, या दृष्टीने प्रयत्न केले जात आहे.

खापरी(धर्मु) येथे गावाचा शैक्षणिक विकास होण्याच्या दृष्टीने शाळा भरतीपूर्व तयारी म्हणून संभावित विद्यार्थी, पालक व प्रतिष्ठित व्यक्तींचे मेळावे, वाचनाची आवड निर्माण करण्याकरिता वाचनालय, गणित मेळावे, माता सभा, विद्यार्थी स्तरानुसार कमाल सोप्या पद्धतीने शिकवणे असे उपक्रम राबविण्यात आले.

गावातील विद्यार्थी ज्या ठिकाणी एकत्र येऊन खेळतात किंवा बसतात अशा अकरा ठिकाणी दोन विषयाच्या संबंधात माहिती लिहिण्यात आली आहे. ज्यात नकाशा, बाराखडी, पाढे, गणितीय सूत्र आणि आकृत्या रेखाटण्यात आल्या आहेत. ज्यामुळे गावातील विद्यार्थ्यांचा हसत-खेळत अभ्यास होत असून त्यांच्यात शिक्षणाची आणि शाळेची गोडी निर्माण होत आहे.