चंद्रपूर- फेसबुकवर आक्षेपार्ह पोस्ट टाकल्याप्रकरणी 'सेल्फ रिस्पेक्ट मूव्हमेंट' संघटनेचे अध्यक्ष बळीराज धोटे यांना अटक करण्यात आली आहे. त्यानंतर आता हे प्रकरण चांगलेच तापले आहे. धोटे यांना शहर पोलीस ठाण्यात आणले असता, येथे जमा झालेल्या नागरिकांनी या घटनेचा तीव्र निषेध नोंदवला. अभिव्यक्ती स्वातंत्र्याची गळचेपी करण्याचा हा प्रकार भाजपकडून केला जात आहे, अशा प्रतिक्रिया यावेळी नागरिकांनी नोंदवल्या.
याबाबत अधिक माहिती अशी, की 20 ऑगस्टला बळीराज धोटे यांनी भगत सिंग यांच्यावर चालवलेल्या न्यायालयीन खटल्याबाबत फेसबुकवर एक पोस्ट टाकली होती. यावर भाजपच्या आयटी सेलकडून शहर पोलीस ठाण्यात तक्रार दाखल करण्यात आली होती. त्यावर पोलिसांनी बळीराज धोटे यांना घरातून ताब्यात घेतले. तसेच त्यांना पोलीस ठाण्यात बसवून ठेवण्यात आले. याबाबतचीही पोस्ट धोटेंनी फेसबुकवर टाकली.
ही घटना सर्वत्र पसरल्यानंतर अनेक नागरिकांनी पोलीस ठाण्यासमोर गर्दी केली. सकाळी धोटे यांची वैद्यकीय चाचणी करून ठाण्यात आणले असता, चांगलाच हाय व्होल्टेज ड्रामा घडला. पोलीस ज्या प्रकारे आपल्याला वागणूक देत आहेत, त्यावर धोटेंनी तीव्र आक्षेप घेतला. आपण काही अतिरेकी नाही किंवा पळून जाणारे नाही, तरी देखील आपल्यावर बळजबरी कशासाठी केली जात आहे? असा सवाल त्यांनी यावेळी उपस्थित केला. मला बोलण्यापासून रोखले जात आहे, असेही धोटे यावेळी म्हणाले. यावेळी धोटे समर्थक आणि पोलिसांमध्ये शाब्दिक चकमक झाली.
