चंद्रपूर: पालकांनी ठोकले शाळेला कुलूप; शाळेत शिक्षकच नसल्याने पालक संतप्त

सेवादासनगर येथे पहिली ते सातवीपर्यंत जिल्हा परिषदेची शाळा आहे. सध्या या शाळेत तीन शिक्षक कार्यरत असून दोन पदे रिक्त आहेत. परिणामी तिन शिक्षकांच्या खांद्यावरच शाळेचा डोलारा उभा आहे.

चंद्रपूर - जिल्हा परिषद शाळेतील शिक्षकाचे पद मागील अनेक दिवसांपासून रिक्त आहे. हे रिक्त पद भरण्याची पालकांनी वारंवार मागणी केली. मात्र शिक्षण विभागाने याकडे दूर्लक्ष केले. अखेर संतप्त पालकांनी शाळेला कुलूप ठोकले. चंद्रपूर जिल्ह्यातील जिवती तालूक्यातील सेवादासनगर येथे हा प्रकार घडला.

बंद शाळा

सेवादासनगर येथे पहिली ते सातवीपर्यंत जिल्हा परिषदेची शाळा आहे. सध्या या शाळेत तीन शिक्षक कार्यरत असून दोन पदे रिक्त आहेत. परिणामी तिन शिक्षकांच्या खांद्यावरच शाळेचा डोलारा उभा आहे. शाळेतील रिक्त पदे भरण्यासाठी पालक आणि शाळा व्यवस्थापन समितीच्या शिष्टमंडळाने 7 डिसेंबरला संवर्ग विकास अधिकाऱ्यांना निवेदन दिले होते. या निवेदनात 11 डिसेंबरपर्यंत शिक्षक न दिल्यास शाळेला कुलूप ठोकू, असा इशारा देण्यात आला होता. मात्र, अद्यापही शाळेला शिक्षक देण्यात आलेला नाही. यामुळे संतापलेल्या पालकांनी शाळेला कुलूप ठोकले.

बंद शाळे समोर उभे असलेले विद्यार्थी आणि पालक

हेही वाचा - झोक्याचा फास लागून शाळकरी मुलाचा मृत्यू; नांदेडच्या पळसपूरची घटना

शाळेला शिक्षक मिळेपर्यंत शाळा उघडणार नाही, असा पवित्रा पालकांनी घेतला आहे. सेवादासनगर येथील शालेय व्यवस्थापन समितीचे निवेदन मिळाले आहे. याच शाळेतील प्रति नियुक्तीवर दिलेल्या शिक्षिकेला पूर्ववत रुजू होण्यासंदर्भात आदेश काढण्यात आला आहे. एक ते दोन दिवसात शाळेत शिक्षक रुजू होतील, अशी माहिती जिवतीचे संवर्ग विकास अधिकारी सुरेश बागडे यांनी दिली आहे.