चंद्रपूर: चंद्रपूर-मूल मार्गावर झालेल्या भीषण अपघातात दोघांचा मृत्यू झाला असून दोघे गंभीर जखमी आहेत.
दुचाकीस्वार चालक प्रितम सुरेश शेजूळे आणि प्रफुल प्रभाकर शेलोटे अशी मृतांची नावे आहेत. तर सुखदेव राऊत आणि नीलेश लहानु मांढरे हे गंभीर जखमी आहेत. चंद्रपूरहून मूलकडे जाणारी नारायणा विद्यालयाची स्कूलबस एका वळणावर विरुद्ध दिशेने येणाऱ्या दुचाकीला धडकली. दुचाकीवर असलेले दोघेजण जागीच ठार झाले.
धडकेनंतर बसचालकाचे नियंत्रण सुटले; व म्हशी घेऊन येणाऱ्या पीकअप या वाहनाला बस धडकली. यामध्ये एक म्हैस जागीच ठार झाली तर दोन म्हशी गंभीर जखमी आहेत.
म्हशी नेणाऱ्या वाहनाच्या मागे असलेल्या दुसऱ्या एका दुचाकी स्वाराने स्वतःचा बचाव करण्याचा प्रयत्न केला. मात्र, हो देखील गंभीर जखमी झाला आहे. म्हशी नेणाऱ्या वाहनाला धडक दिल्यानंतर बस चालकाने एका झाडाला धडक दिली. संबंधित घटनेचा पुढील तपास मूल पोलीस करत आहेत.
